Así será a Selectividade de 2019
Realizarase antes do 15 de xuño e requirirá un 4 para aprobar.
Por Europa Press / Redacción | Santiago de Compostela | 16/01/2019 | Actualizada ás 13:08
As probas de Selectividade, agora denominada EvAU (Avaliación de Acceso á Universidade) ou EBAU (Avaliación de Bacharelato para o Acceso á Universidade), terán que celebrarse antes do 15 de xuño de 2019 en todas as comunidades autónomas españolas, e o alumnado deberá sacar polo menos 4 puntos sobre 10 para poder estudar un grao universitario.
Así se establece na orde ministerial publicada este pasado martes no Boletín Oficial do Estado (BOE) que determina as características, o deseño e o contido da avaliación de Bacharelato para o acceso á Universidade, e as datas máximas de realización para o actual curso 2018-2019. A proba non presenta novidades respecto da do ano pasado.
Segundo esta orde, os resultados provisionais das probas de Selectividade deste ano deberán ser publicados antes do 28 de xuño. A convocatoria extraordinaria destas probas poderá realizarse antes do 13 de xullo, se a comunidade autónoma opta por celebrala neste mes, ou antes do 14 de setembro, no caso de que se prefira convocala a finais de verán.
A proba de Selectividade só é obrigatoria para os alumnos que queiran estudar un grao universitario, e examinaranse exclusivamente das materias de 2º curso de Bacharelato cumprindo unha serie de obxectivos de aprendizaxe establecidos, e cuxas cualificacións se calcularán ponderando un 40% a nota da proba, que se supera cun 4 sobre 10, e un 60% a da etapa. O resultado haberá de ser igual ou superior a 5 para poder acceder á Universidade.
O ano pasado, uns 300.000 estudantes realizaron a Selectividade en España. En 2017, matriculáronse nas Probas de Acceso á Universidade un total de 280.852 alumnos, dos que o 55,8% foron mulleres. Así, do total de alumnos inscritos, finalmente, presentáronse un total de 264.980 ás probas e 230.530 estudantes superáronas.
A proba tivo novidades o ano pasado, como que os estudantes puidesen subir nota examinándose dunha segunda lingua estranxeira ademais da que lles sexa obrigatoria, unha proba voluntaria que a universidade poderá ter en conta nos seus procesos de admisión.
Tamén se pode mellorar a nota examinándose de, polo menos, dúas materias optativas de segundo curso, ou presentándose a sucesivas convocatorias da proba, nese caso, a nota que se terá en conta será a máis alta que se obteña.
