Correos presenta unha tarxeta bancaria orientada aos peregrinos

Correos presentou este venres en Compostela a nova Targeta Correos Prepago Mastercard Camiño de Santiago, un servizo orientado aos peregrinos para facilitar os seus pagos e ofrecerlles unha "maior seguridade" na xestión do seu diñeiro durante a ruta.

O director territorial de Correos, Ángel Pérez, e o xerente do Xacobeo, Rafael Sánchez, foron os encargados de presentar este novo produto, que pode recargarse durante as etapas, non está vinculada a ningunha conta corrente e pode bloquearse e desbloquearse desde o teléfono móbil, incrementando a seguridade.

Ángel Pérez explicou que este cartón permite pagar en establecementos, facer compras online e sacar diñeiro dos caixeiros en toda a rede Mastercard ou nas oficinas de Correos do Camiño. Do mesmo xeito, destacou que facilita aos peregrinos estranxeiros "evitarse inconvenientes por cambio de divisas".

Pola súa banda, o xerente do Xacobeo, fixo fincapé na importancia de iniciativas como esta para seguir facendo do Camiño de Santiago "unha experiencia viva e dinámica" e garantiu o compromiso da Xunta en "mellorar a atención ao peregrino" e en "coidar e manter todos os itinerarios" a Compostela.

DISPOÑIBLE EN OFICINAS

O cartón Correos Prepago Mastercard Camiño de Santiago está dispoñible nas oficinas postais do Camiño de Santiago e nas Oficinas Principais das capitais de provincia de toda España. O seu custo é de 6 euros e debe realizarse unha recarga mínima inicial de 10 euros.

O servizo está dispoñible en Google Pay, polo que permite pagar as compras co móbil sen necesidade de ter que levar o cartón encima durante o Camiño. Coa propia aplicación de Google Pay é posible realizar un seguimento de todos os movementos do cartón, ver o saldo e facer recargas. Os peregrinos poden, ademais, recargar o cartón en calquera das máis de 2.400 oficinas de Correos deEspaña, en efectivo ou con cartón.