Dúas persoas trasladadas por unha intoxicación nun piso da Coruña
Ao parecer, a acumulación de monóxido de carbono debíase ao mal funcionamento da caldeira.
Por E.P. | SANTIAGO DE COMPOSTELA | 20/01/2019 | Actualizada ás 10:41
Dúas persoas tiveron que ser trasladadas polos servizos sanitarios de urxencias tras sufrir unha intoxicación por acumulación de monóxido de carbono no interior da súa vivenda, na Coruña.
Segundo a información facilitada ao 112 Galicia, o suceso produciuse preto das 23,30 horas deste sábado, nun piso situado na rúa Mosteiro de Caaveiro.
Ata o lugar acudiu un equipo do 061-Urxencias Sanitarias que detectaron altos índices de monóxido de carbono, conforme ás ferramentas utilizadas para este fin.
Os xestores do CIAE 112 solicitaron a intervención dos bombeiros da Coruña, da Policía Local e pasaron o aviso aos voluntarios de Protección Civil.
Tras realizar as comprobacións necesarias, os bombeiros confirmaron que o monóxido de carbono proviña do funcionamento defectuoso da caldeira.
