Algúns consellos para actuar ante síntomas de gripe

A Fundación Pública Urxencias Sanitarias de Galicia-061 aconsellou gardar repouso na casa, ata que remitan os síntomas de gripe, e porse en contacto cos seus profesionais sanitarios no caso de necesitar seguimento do proceso gripal. Beber moito líquido, estar en espazos con boa ventilación e coidar a hixiene son outras das recomendacións.

Estas advertencias realízanse ante o incremento, nos últimos días, da incidencia dos síntomas gripais entre a poboación. O Sergas prevé que a partir da próxima semana se produza o comezo da onda epidémica de gripe na comunidade autónoma.

O ano pasado, entre o 1 de xaneiro e o 31 de marzo, os profesionais sanitarios da Central de Coordinación do 061 de Galicia atenderon 7.602 chamadas de demanda sanitaria por síntomas relacionados con procesos gripais.

Así, Urxencias Sanitarias de Galicia-061 recorda que a gripe é unha enfermidade vírica, que na maioría dos casos é leve e sen complicacións e que as persoas que a sofren poden ter febre superior a 38ºC, tose, dor de garganta, conxestión nasal, estornudos, malestar xeral, dores musculares e dor de cabeza cunha duración de ata sete días.

COMO ACTUAR SE SE TEN GRIPE

Se se manifestan síntomas gripais, o 061 recomenda permanecer no domicilio en repouso, beber abundantes líquidos, principalmente auga e zumes, e manter unha dieta saudable e equilibrada mediante o consumo de froitas e verduras. Tamén resulta importarse lavar as mans frecuentemente con auga e xabón, tapar o nariz ou a boca ao toser, utilizar panos de usar e tirar e evitar tocar os ollos, o nariz ou a boca.

Ademais, debe manter unha boa hixiene xeral do domicilio, repousar nun espazo individual con boa ventilación e reducir o contacto con outras persoas ata que pasen 24 horas desde a última vez que tivo febre. Deste xeito, diminuirán as posibilidades de contaxio que ten lugar, xeralmente, desde o primeiro día antes de manifestar os primeiros síntomas gripais ata sete días despois. Entre outras medidas, recoméndase que se controle a febre e se utilicen antitérmicos no caso de que a temperatura corporal supere os 38,5º C.

O 061 fai fincapé na recomendación de que non se tomen antibióticos nin antivirais a menos que o indique un profesional sanitario. Os procesos gripais están causados por virus que, polo tanto, non responden o tratamento con antibióticos.

Ante calquera dúbida relacionada coa gripe, pódese chamar ao teléfono 061 ou 902 400 116 para contactar con profesionais sanitarios que darán as pautas necesarias de actuación ou realizarán o seguimento do proceso gripal mentres garda repouso na casa.

En caso de que a febre supere os 38,5º C e persista durante máis de tres días, os síntomas da gripe continúen pasados xa sete días desde o comezo ou se sufra un empeoramento repentino, os afectados deben porse en contacto cos profesionais sanitarios de Urxencias Sanitarias de Galicia-061.

Outras situacións que deben ser consultadas son: mareos, náuseas ou alteracións da conciencia tales como dificultade para espertarse ou irritabilidad; a aparición de erupcións cutáneas; ou a dificultade para respirar, a expectoración sanguinolenta ou dor no peito.

Para rematar, se se pertence a algún dos grupos considerados de risco, como enfermos de corazón ou respiratorios crónicos, diabéticos, enfermos hepáticos ou embarazadas, entre outros, aconséllase marcar o 061 ou o 902 400 116 en caso de calquera dúbida ou consulta sobre a gripe a profesionais sanitarios.