Galicia busca novas vías de colaboración con Cuba

O director xeral de Relacións Exteriores e coa UE, Jesús Gamallo, reuniuse este luns co embaixador de España en Cuba, Juan Fernández Trigo, no marco dunha visita á illa para analizar as vías de colaboración abertas co país e explorar novas alternativas.

Tal como sinalou a Xunta, Gamallo informouse do estado xeral das relacións entre España e Cuba, así como das posibilidades de investimento, dos fluxos comerciais existentes neste momento e da situación derivada da posibilidade de que os cidadáns cubanos poidan saír da illa.

Nos próximos días, o director xeral tamén visitará o proxecto de cooperación que se está desenvolvendo da man do Fondo da ONU para a Infancia (Unicef). Ademais, manterá encontros con outras autoridades cubanas.

Nestas reunións, tal como apuntou o Goberno autonómico, avaliaranse novas posibilidades de cooperación, como a de ofrecer cooperación técnica en ámbitos como a pesca artesanal, "para aproveitar mellor os recursos da illa e apoiar a seguridade alimentaria".

Desde 2004, Galicia colaborou con Cuba para a posta en marcha de distintos proxectos de cooperación "debido aos lazos especiais de unión con este país".