O PPdeG evita que o relacionen con Vox e o PSdeG cre que non influirá en Galicia

O vicepresidente da Xunta, Alfonso Rueda, insistiu en que o PPdeG ten "as cousas claras" no que respecta á loita contra a violencia machista, polo que proclamou que "nin un paso atrás" nesta política. Así se pronunciou xunto ao presidente da Fegamp, o socialista Alfredo García, quen, pola súa banda, tamén a preguntas dos xornalistas, opinou que Vox non vai influír na política galega "baixo ningún concepto".

Ambos se reuniron este mércores para abordar o desenvolvemento das medidas con cargo a recursos do pacto de estado contra a violencia de xénero, como un programa dotado de 2 millóns de euros para fomentar a contratación de vítimas en concellos.

Outra das actuacións que impulsará este pacto é unha campaña de sensibilización, que o vicepresidente galego defenfeu para momentos nos que "alguén non ten as cousas claras", co obxectivo de que "non haxa ningunha dúbida".

Tamén afirmou non toparse con "ningunha dúbida" no Partido Popular. "Dixéronse moitas cousas, houbo moito ruído de declaracións pero ao final, afortunadamente, creo que todos temos as cousas claras", expuxo, en referencia á polémica orixinada pola irrupción de Vox. "Se non, que nos pregunten a nós, que as temos clarísimas", defendeu Rueda.

Así, cuestionado sobre a interpelación que lle fará En Marea no Parlamento galego sobre o pacto con Vox en Andalucía, respondeu cunha "primeira valoración". "Debemos estar a facer as cousas bastante ben desde o Goberno cando resulta que o que nos teñen que preguntar é por un pacto ao que se chega noutra comunidade autónoma e (sobre) un goberno que non ten nada que ver coa Xunta de Galicia", destacou.

"Debe ser que o que estamos a facer está todo ben. Alégrome dese recoñecemento implícito de que aquí as cousas van ben e hai que preocuparse do que fan outros", incidiu. Por outra banda, sobre posibles efectos nas eleccións municipais, limitouse a que "o que fagan os demais, os electores son moi libres". Ao seu xuízo, "cada un retrátase coas cousas que fai ou coas que non fai" e "a xente é bastante máis lista do que algúns pensan".

VIOLENCIA MACHISTA

Para rematar, interrogado sobre as críticas da portavoz do BNG, Ana Pontón, Alfonso Rueda sinalou "dúas formas" de abordar este asunto, unha "destrutiva" e outra "construtiva". "Creo que ás vítimas aprovéitalles moito máis que fagamos cousas a que esteamos a descualificar ao adversario utilizando como argumento a violencia machista", contrapuxo, antes de advertir de que os populares están "afeitos a que o faga o Bloque". Pontón, censurou, "leva moito tempo facendo o mesmo" e "iso aproveita pouco ás vítimas".

Mentres, o socialista que preside a Fegamp valorou que "baixo ningún concepto" Vox poderá "condicionar" a política galega con "decisións ou opinións que nin eles mesmos son capaces de defender".

"O problema é que é un problema real. Hai mulleres que son maltratadas e hai violencia de xénero, non só dentro da parella e das paredes das casas: nas rúas, institutos, colexios... Negar iso é absurdo, xa que logo non vexo ningún perigo nin capacidade en Galicia de que Vox poida influír nesta política", resolveu.

PACTO DE ESTADO

Rueda comezou reivindicando o "gran consenso" relativo ao pacto de estado contra a violencia de xénero que se alcanzou na comunidade galega. "Agora o que toca é desenvolvelo e para iso hai recursos económicos que teñen que ser empregados do mellor xeito posible", indicou.

Así, a Galicia correspóndenlle 8 millóns de euros cada ano, durante cinco, mentres que as entidades locais galegas recibirán 1,2 millóns, apuntou. Segundo enumerou, as medidas dirixiranse a reforzar a formación do persoal ao servizo da administración, prevención en eventos culturais como festivais e axuda aos centros de atención á muller.

"IMPORTANTE CONSENSO"

Do seu lado, o responsable da Fegamp resaltou o "importante" de que haxa consenso "nestes tempos que corren", para afrontar un "gran problema" como este. Tamén fixo referencia a que o Executivo central "decidiu nalgún momento que os servizos sociais e todo o que representaban os temas de igualdade non fosen competencia municipal", para engadir que agora "parece que se está no bo camiño para que todo iso volva ao seu sitio" e sexan os concellos os encargados de xestionar estes asuntos, en colaboración coas comunidades.

Fronte a postulados "moi teóricos", pola súa banda avogou por ser "menos prosaicos" e asumir que "para resolver estes problemas fai falta diñeiro", que co pacto de estado vai haber, o cal lle leva a estar "seguro" de que as medidas "van dar os froitos" e avanzarase de modo que "dentro dun ano a situación será mellor que hoxe".