Ana Miranda (BNG) di que a norma europea de seguridade ferroviaria non se cumpre agora nin no 2013

A eurodeputada do BNG Ana Miranda celebrou a apertura dun expediente a España por parte de Bruxelas como "unha noticia moi esperanzadora para saber a verdade" sobre o accidente do Alvia en Angrois. Miranda, que en xullo de 2017 interpuxera unha denuncia contra o Estado por infracción do dereito comunitario en materia de seguridade ferroviaria, remarcou que a lexislación "non está implementada" agora nin "tampouco se cumpría no ano 2013".

Así se pronunciou logo de facer público a Comisión Europea o expediente sancionador aberto a España en materia de seguridade ferroviaria, ao considerar que "os procesos de seguridade non cumpren os requisitos da lexislación da Unión Europea sobre seguridade ferroviaria", por unha directiva de 2004.

A Comisión, en concreto, considera que se detectaron deficiencias na forma en que o organismo nacional de investigación analiza e investiga os accidentes e incidentes, así como nas técnicas de supervisión por parte da autoridade nacional responsable da seguridade".

As primeiras palabras de valoración deste feito por parte de Miranda foron para as vítimas, "polo duro traballo que fixeron todos estes anos". No sinistro de Angrois morreron 80 persoas e 144 resultaron feridas.

As "seguintes palabras" dirixiunas "ao traballo exhaustivo que se tivo que facer aquí (por Bruxelas), desde o BNG e tamén coas vítimas, para recoñecer e para trasladar á Comisión Europea que non se fixo o control integral de riscos" na liña do descarrilamento do Alvia. Este é o "primeiro paso" dun procedemento que "vai ser longo", apuntou Miranda, xa que o Goberno central ten agora "dous meses" para contestar.

Respecto diso, explicou que o que se "analiza" por parte de Bruxelas é "a situación actual sobre o estado da lexislación comunitaria", pero argumentou que "isto quere dicir que tampouco se cumpría no accidente do Alvia, no ano 2013". "Agora o estado ten que enviar unha carta sobre a implementación desa normativa. Sabemos que non está implementada, xa que logo se pasaría á segunda fase", chamou a atención.

Deste xeito, reivindicou unha "noticia moi esperanzadora para saber a verdade, para a xustiza e as vítimas, para dar unha resposta á opinión pública nese consentimento que tiveron gobernos de PP e PSOE en calar este asunto". "Esixiremos responsabilidades políticas", advertiu a eurodiputada.

Satisfeita con que a Comisión "dea a razón tanto á denunciante como ás propias vítimas", remarcou que "nin Renfe, nin Adif, nin Fomento, nin o Goberno de España cumpriron a lexislación" en materia de seguridade ferroviaria.

"Sabemos que temos razón", insistiu, para anunciar este como "o primeiro paso dunha vitoria entre David e Goliat". O caso seguirao "exhaustivamente" Miranda, quen xa solicitou entrevista á directora xeral e á comisaria de Transporte.

CONSECUENCIAS NO XULGADO

Por outra banda, cuestionada sobre a afectación deste expediente sobre a instrución xudicial do accidente do Alvia, opinou que "o xuíz tería que reabrir o caso" para que este implique "ao estado". "Xa non é que o diga a deputada do BNG ou as vítimas, está a dicilo a Comisión Europea", incidiu. Así, esperou que "mañá mesmo a Audiencia Provincial da Coruña se sitúe para a revisión do caso e non para o peche da instrución". "É unha oportunidade histórica para a xustiza e para a verdade das vítimas", sentenciou.

O xuíz decretou en decembro o peche da instrución con dous investigados, o maquinista e o ex-xefe de seguridade de Adif, pero esta decisión está recorrida e deberá ser a Audiencia a que resolva.