Anova corrixe a Beiras
Antón Sánchez nega que a súa formación ofrecese ao BNG concorrer de forma conxunta ás eleccións europeas.
- Anova aposta pola coalición Bildu, ERC e BNG para concorrer ás eleccións europeas
- O BNG pecha a porta a Anova para as europeas: "Non estamos para solucionar as leas de En Marea"
- Bildu "respecta" a posición do BNG de pecharlle a porta a Anova e ERC evita pronunciarse
Por Europa Press / Redacción | SANTIAGO DE COMPOSTELA | 26/01/2019 | Actualizada ás 12:52
O portavoz nacional de Anova, Antón Sánchez, negou que a súa formación fixese ningún ofrecemento ao BNG para concorrer en alianza ás europeas e limitou a "unha opinión" que o confundador de Anova, Xosé Manuel Beiras, ofrecese iniciar "conversacións" para incluír á formación galega na candidatura que EH Bildu, ERC e BNG teñen xa pechada.
Nunha entrevista na Radio Galega recollida por Europa Press, o tamén viceportavoz de En Marea no Parlamento asegurou que "nunca houbo ningunha proposta concreta de concorrencia ás europeas por parte de Anova, polo tanto a partir de aí todo o resto, sobra". Esta corrección a Beiras chega logo de que o BNG pechara a porta a un pacto con Anova e de que Bildu e ERC evitaran entrar en conflito co seu socio.
Nesta liña, Sánchez profundou na idea de que "en absoluto Anova puido facer esa proposta porque non ten decidida a fórmula de concorrencia". Así, avanzou que no espazo "haberá que establecer conversacións" antes de "tomar unha decisión", que espera poder ter no mes de marzo. O viceportavoz de En Marea no Parlamento de Galicia destacou a importancia de "saber ler o momento" e "o perigo que neste contexto ten a extrema dereita".
MARCAS DE MAREAS NAS MUNICIPAIS
Na entrevista, Sánchez tamén deu conta das fórmulas de concorrencia de Anova de cara ás eleccións municipais. Así, declarou que "o gran obxectivo" é "apoiar, traballar as candidaturas de unidade popular dos concellos que funcionaron dun modo cohesionado".
Sánchez explicou que a súa formación aposta porque "alí onde houbese esas candidaturas, os militantes de Anova participarían a nivel individual, en pé de igualdade". O portavoz nacional de Anova afirmou que "o primeiro obxectivo" é que "en cada concello a amplitude das candidaturas sexa a maior posible", pero que en cada un tense que decidir a fórmula".
Sobre a posibilidade de que nun mesmo concello se presenten varias marcas de mareas rupturistas, Sánchez opinou que "non é eficaz" e que non lles parece ben "que se fragmente o voto". Ademais, detallou que en Ferrol apoiarán "a candidatura de Ferrol en Común con Jorge Duarte".
