Veciños de Poio imitan aos independentistas cataláns e rodean a casa consistorial
O PP, impulsor deste acto, di que o "éxito" desta convocatoria é un sinal "de que a xente de Poio está farta das mentiras do alcalde.
Por Europa Press / Redacción | SANTIAGO DE COMPOSTELA | 27/01/2019 | Actualizada ás 19:16
Centos de veciños do concello pontevedrés de Poio rodearon este domingo a casa consistorial para demandar uns impostos "xustos" e uns servizos "dignos" nun acto convocado polo Partido Popular da localidade. Un acto que se asemella as cadeas que os independentistas cataláns realizaron contra edificios públicos en Cataluña.
Tal como sinalou o PP de Poio nun comunicado, sobre as 13,00 horas, os veciños da localidade formaron unha cadea humana ao redor do edificio do concello para reivindicar "uns impostos xustos e uns servizos dignos para todos".
Segundo o PP, os convocados entrelazaron as mans e formaron un círculo ao redor do edificio que, "pola gran cantidade de xente", foise ampliando ata o cruceiro e chegou ao campillo.
Para o portavoz popular, Ángel Moldes, o "éxito" desta convocatoria é un sinal "de que a xente de Poio está farta das mentiras do alcalde Luciano Sobral". "En 24 anos foi incapaz de cumprir as súas promesas e de escoitar aos veciños", sinalou.
"Xa sabemos que algúns nos critican por facer propostas para baixar os impostos e mellorar a vida dos veciños", indicou Moldes, quen engadiu que "son os mesmos que levan catro anos facendo as mesmas promesas e incumpríndoas".
