Piden un centro de fauna mariña tras o aumento de cetáceos varados en Galicia

Asociacións animalistas propoñen medidas de prevención para protexer estas especies, como modificar a velocidade das embarcacións ou transformar o acuario municipal da Coruña nun espazo de rescate e rehabilitación destes animais.

Por E.P. | Santiago de Compostel | 28/01/2019 | Actualizada ás 12:17

Comparte esta noticia

A Asociación Animalista Libera e a Fundación Franz Weber mostraron este luns a súa "preocupación polo número de varamentos de cetáceos documentado" nas costas galegas nas últimas semanas e pediron "máxima colaboración" ás administracións no desenvolvemento de accións preventivas, así como un centro de fauna mariña.

Balea varada en Galicia
Balea varada en Galicia | Fonte: CEMMA.

Segundo unha investigación da Whale and Dolphin Conservation Society, explicaron estas asociacións, "estímase que unha de cada tres baleas morre no planeta por mor de colisións con barcos", o que, ao seu xuízo, "poderíase previr establecendo medidas obrigatorias para, por exemplo, modificar a velocidade das embarcacións, tal e como xa existe en Chile cunha lei pioneira que pretende protexer aos cetáceos".

Os animalistas advirten de que en Galicia, a pesar das "continuadas promesas da Xunta" nos últimos anos, "segue sen existir un centro de recuperación de fauna mariña". Así, avanzaron que retoman a súa campaña para "lograr un recinto destas características a través dun proceso de reconversión".

FFW e LIBERA! suxeriron reformular o acuario municipal da Coruña como sede destas operacións de rehabilitación, rescate e prevención, que "serviría tamén para desenvolver programas educativos ao conxunto da cidadanía, resultando un proceso máis económico que construír unha instalación desde cero", consideran.

Ademais, os defensores dos animais sinalan que para lograr esta proposta "requírese cooperación entre administracións", desde a local ao Goberno central, e poñen como exemplo a creación e funcionamento do "CRAM, un centro de recuperación pioneiro de Cataluña que facilita a reintrodución no mar Mediterráneo de decenas de especies cada ano".

Ambos colectivos consideran que a Xunta "debería pactar co Goberno central o desenvolvemento de medidas preventivas", así como "campañas de sensibilización para evitar a explotación do espazo mariño, as verteduras continuadas de plásticos, outra grave ameaza para os animais", expoñen, ademais dun "profundo cambio de hábitos na cidadanía, para que coñezan os medios dispoñibles ante  varamentos", conclúen.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta