As novas oposicións para a Xunta convocaranse durante o primeiro trimestre do ano
A oposición asegura que o acordo asinado con CC.OO. e UGT "non recupera" dereitos perdidos "durante o últimos dez anos".
Por Europa Press / Redacción | SANTIAGO DE COMPOSTELA | 29/01/2019 | Actualizada ás 14:08
O conselleiro de Facenda, Valeriano Martínez, anunciou este martes que será durante "o primeiro trimestre" do ano cando a Xunta concretará a oferta pública de emprego (OPE) que prevé o acordo asinado o pasado 15 de xaneiro con UXT e CC.OO. En total, prevese unha convocatoria de máis de 4.000 prazas ata 2020 (entre promocións e de libre disposición) que permitirán que Galicia siga sendo "a Comunidade con menor taxa de temporalidade".
Ademais, avanzou que se abrirá "en poucos meses" o prazo para que os traballadores soliciten adherirse ao sistema de carreira profesional, que se implementa "por primeira vez" na función pública autonómica e que redundará en incrementos retributivos entre 761 e 2.640 euros, segundo a categoría profesional.
Así o fixo o conselleiro durante a súa comparecencia no pleno do Parlamento galego, no que insistiu no carácter "histórico e transcendental" deste acordo que é, segundo as súas palabras, o "máis importante das últimas décadas", posto que beneficiará "a máis de 21.500 familias".
"DESACORDO DE DESCONCERTACIÓN"
Tras a intervención do titular de Facenda, o deputado do BNG Luís Bará tachou de "mal acordo" o asinado con CC.OO. e UXT, xa que "son minoritarios" en relación con CSIF e CIG, que, en suma, ostentan a maioría da representación. "Falan dun acordo de concertación que en realidade é un desacordo de desconcertación", chanceou.
Pola súa banda, a deputada de En Marea Julia Torregrosa lamentou que co acordo "non se recuperan" os dereitos "que se perderon". "A subida é positiva, pero lonxe de ser triunfalista é claramente insuficiente", dixo. Neste sentido, cifrou no 15 por cento o poder adquisitivo perdido "durante o últimos dez anos" por este colectivo, xa que as políticas do PP na Xunta manteñen ás administracións "sen persoal suficiente".
O deputado do Grupo Socialista Juan Díaz Villoslada considerou "excesivo" o "triunfalismo" do conselleiro no catro puntos dun acordo que supón, ao seu modo de ver, noutra "rectificación" da Xunta en políticas "que vén aplicando desde 2010" e que radican en "a grave deterioración dos servizos públicos de Galicia".
