Alerta laranxa por fenómenos costeiros, vento e forte choiva en Galicia
As chuvias poderán ser moi fortes en zonas do oeste e roeste de Galicia. A Xunta amplía a alerta laranxa vixente por temporal a todo o litoral galego
Por Europa Press / Redacción | MADRID | 30/01/2019 | Actualizada ás 10:04
A Dirección Xeral de Emerxencias e Interior da Vicepresidencia da Xunta amplía este mércores a alerta laranxa vixente por temporal a todo o litoral galego.
Segundo informou a Vicepresidencia da Xunta nun comunicado, en relación ás indicacións da Axencia Estatal de Meteoroloxía (Aemet), está en nivel laranxa o litoral noroeste e oeste da provincia da Coruña e o litoral lucense.
A partir das 12,00 horas deste mércores amplíase ao suroeste da Coruña e, a partir das 18,00 horas afectará tamén á provincia de Pontevedra. Espérase mar combinado do noroeste con ondas de cinco a seis metros. A causa do temporal costeiro, Vicepresidencia aconsella a suspensión das actividades pesqueiras e marisqueiras como "medida preventiva" naquelas zonas máis perigosas.
Tamén recomenda que "se extremen as medidas de seguridade", indica a Xunta, á hora de realizar calquera actividade no mar e que se revisen os cabos e amarres das embarcacións.
CONSELLOS
Entre as recomendacións a Xunta inclúe evitar os percorridos polas instalacións portuarias, en especial en zonas de perigo como diques e escaleiras de acceso aos diques e peiraos, entre outros.
Ademais, aconséllase evitar percorridos en vehículos preto dos peiraos e evitar aparcar nos portos. A iso engádese non pasear preto dos bordos litorais, paseos marítimos e zonas próximas ao mar, sobre todo nas batidas polo vento.
FORTES CHOIVAS
Un total de 25 provincias do terzo norte e do leste da Península e Baleares terán este mércores avisos de risco (amarelo) ou risco importante (laranxa) por vento, choiva, neve, aludes ou fenómenos costeiros --entre elas as do litoral galego--, segundo informou a Axencia Estatal de Meteoroloxía (AEMET).
Hai aviso de risco importante por fenómenos costeiros nos litorais da Coruña, Lugo, Asturias, Cantabria, Biscaia, Guipúzcoa, Tarragona, mentres que o aviso será amarelo en Mallorca, Pontevedra, Xirona, Barcelona, Menorca e na cidade autónoma de Melilla.
Pola súa banda, a choiva manterá con aviso por risco a Pontevedra e A Coruña, onde se poden acumular 15 litros por metro cadrado nunha hora. Estas precipitacións serán en forma de neve en varias provincias do terzo norte.
En xeral, este mércores estará marcado polos fortes ventos con refachos moi fortes no litoral de Galicia, na área cantábrica, Pireneos, Empordán, Baleares e as comunidades do Levante, así como polas nevadas en zonas de montaña do terzo norte peninsular.
A AEMET prognosticou que en gran parte da Península produciranse choivas e chuvascos que poderán ser fortes ou persistentes en Galicia, Cantábrico oriental e Pireneos, principalmente na segunda metade do día. De feito, advirte de que poderán ser mesmo moi fortes en zonas do oeste e noroeste de Galicia.
A neve pode aparecer en calquera cota de Pireneos, en torno a 600 a 800 metros no resto do terzo norte peninsular aínda que subirá por encima de 1.800 metros ao final do día e no centro nevará a partir duns 400 a 800 metros.
