A "coordinación" entre atención primaria e hospitalaria, entre as demandas dos pacientes ao Sergas

Representantes da Consellería de Sanidade e do Servizo Galego de Saúde (Sergas) reuníronse con directivos de varias asociacións de pacientes para solicitar as súas propostas no deseño dun novo modelo de atención primaria. Entre as suxerencias, falouse da necesidade de "coordinación" entre primaria e hospitalaria.

Así, mantiveron unha xuntanza coa Federación Galega de Enfermidades Raras e Crónicas (Fegerec) e coa Federación de Asociacións Galegas de Familiares de Enfermos de Alzheimer e outras Demencias (Fagal). Os temas abordados van dende "a accesibilidade da atención no primeiro nivel asistencial" para que sexa "o máis rápida posible", ata a "importancia" do seguimento dos pacientes, pasando pola "coordinación" entre primaria e hospitalaria "para evitar a reagudización das patoloxías".

Tamén se trataron outras cuestións como as visitas a domicilio do persoal sanitario, a "transcendencia" do traballo en equipo para atender ás necesidades destes colectivos, así como "a potenciación" do traballo conxunto entre profesionais e asociacións de pacientes.

Neste contexto, o Sergas considera "moi necesarias" estas reunións realizadas "para mellorar a atención primaria", dado o "coñecemento" dos servizos sanitarios por parte das asociacións de pacientes e a súa inclusión no Consello Asesor de Pacientes.