Unanimidade de todos os grupos para que a toponimia galega sexa Patrimonio da Humanidade

A Cámara recoñece a institución da Masonería e insta o Goberno axilizar os trámites para elaborar un censo de instalacións deportivas.

Por Europa Press / Redacción | SANTIAGO DE COMPOSTELA | 06/02/2019 | Actualizada ás 18:37

Comparte esta noticia

Os catro grupos do Parlamento galego aprobaron unha proposición na que animan á Xunta a estudar unha posible candidatura para que a toponimia galega sexa declarada Patrimonio da Humanidade da Unesco.

A iniciativa, presentada polo Grupo de En Marea e cuxo texto foi modificado antes de ser sometido a votación, recibiu o respaldo unánime da Cámara este mércores durante a Comisión 1ª Institucional, de Administración Xeral, Xustiza e Interior.

O texto aprobado insta á Xunta a "valorar a candidatura da toponimia galega a Patrimonio da Humanidade da Unesco, estudando se sería posible e realista conseguir esta declaración". Ademais, tamén fai un chamamento ao Goberno galego para que dea "un novo impulso ao desenvolvemento de plans e programas para a recuperación, defensa e salvaguardia da toponimia galega".

Así mesmo, nesta mesma Comisión 1ª e a proposta do PSdeG, os grupos aprobaron por unanimidade recoñecer e declarar a "honorabilidade" da institución da Masonería e apoiar o dereito dos seus membros "a defender os seus ideais no marco dun ordenamento democrático que, como o español, ampare o exercicio dos dereitos de liberdade de conciencia e pensamento, un obxectivo que debería estenderse a todos os países do mundo".

CENSO DE INFRAESTRUTURAS DEPORTIVAS

Ademais, o Parlamento tamén reclamou á Xunta que "axilice os trámites" para a elaboración dun censo de infraestruturas e equipamentos deportivos na comunidade.

O texto aprobado co respaldo de todos os grupos con representación na Cámara sinala que este texto debe ser un paso para "avanzar" na redacción, en colaboración con deputacións e concellos, dun plan xeral de instalacións e equipamentos deportivos.

Proxecto sobre toponimia
Proxecto sobre toponimia | Fonte: RAG

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta