Por Europa Press / Redacción | VIGO | 07/02/2019 | Actualizada ás 15:43
O portavoz de En Marea no Parlamento galego, Luís Villares, cualificou como "positivo" que haxa "mediación" en Cataluña, e sinalou, en alusión á manifestación convocada por PP, Vox e Ciudadanos, que é "sorprendente" que se promova un acto "que fomenta a confrontación".
Luís Villares afirmou que "non hai nada que valorar" porque "o que acorden, na medida en que poida contribuír a desbloquear a situación, será recibido positivamente". "Buscar a mediación, o diálogo, ten que ser visto como algo positivo, non como algo negativo", concluíu.
Con respecto á manifestación, o portavoz do En Marea sinalou que lle "sorprende" que a xente "se manifeste en contra do diálogo". "Parece sorprendente, parece que é unha manifestación que fomenta a confrontación, o odio entre cidadáns", proclamou, e incidiu en que el é partidario das manifestacións "que amplíen dereitos, non que os restrinxan".
NEGOCIACIÓN DOS ORZAMENTOS
Por outra banda, Villares referiuse á negociación para a aprobación dos Orzamentos Xerais do Estado e reiterou que a "posición de partida" de En Marea é rexeitalos, porque son "inaceptables en termos de investimentos" para Galicia.
A ese respecto, lembrou que En Marea ten como marco de referencia nesa negociación a súa "axenda galega do cambio", así como un marco económico, que pasa por recuperar o "diferencial de 38 puntos" que, ao seu xuízo, Galicia perde con estas contas. "Que teñan moi claro que non haberá un apoio incondicional nin subordinado ás migallas", incidiu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.