Os socialistas galegos condenan as palabras de Casado sobre o aborto e din que "está a perder o norte político"

O secretario xeral do PSdeG, Gonzalo Caballero, condenou as declaracións do líder do PP, Pablo Casado, sobre o aborto e considerou que o dirixente popular "está a perder o norte político" coas súas formulacións de "regreso ao pasado".

O xefe de filas dos socialistas galegos pronunciouse deste xeito ao ser preguntado polas declaracións nas que Casado se mostrou partidario de derrogar a actual normativa de prazos e volver á de supostos aprobada en 1985 polo Goberno de Felipe González. "Se queremos financiar as pensións e a saúde debemos pensar en como ter máis nenos e non en como os abortamos", asegurou o líder do PP.

Para Gonzalo Caballero o "regreso ao pasado" constitúe unha "irresponsabilidade absoluta" que só se pode entender polo "medo" a perder electores cara a Vox. No entanto, augurou que "esta falta de respecto ás mulleres" e "estes discursos propios doutro tempo" implicarán "unha maior caída electoral" do PP. "Como cando hai 15 anos saían á rúa contra o matrimonio entre persoas do mesmo sexo da man de Rouco Varela e iso non os levou ao goberno", indicou.