A escura noite de Rob

Nesta décimo sétima entrega de 'Viaxes sen Lee', a exploración emocional de Gabriel Rei-Doval bate de novo coa turbia mirada de Rob, agora na escuridade de Wyoming.

Por Gabriel Rei-Doval | Buffalo (Wyoming, USA) | 10/02/2019 | Actualizada ás 12:35

Comparte esta noticia

Desde Deadwood chegara ata Hulett a través do Spearfish Canyon. Poida que a materia inerte das Dakotas se coase en Wyoming por intercesión da lámpara de Aladdin e pretendese ficar comigo por un tempo. Sen saber aínda do proceso de purificación que había experimentar no refuxio do oso, vinlle as orellas á escura noite de Hulett. Se cadra foron as expectativas de pioneiro frustrado no motel onde Mr. Clean era persoa non grata e a Disiclín lle confiscaran o pasaporte. E, sen dúbida, á sensación de noxo contribuíra tamén aquela manda de rednecks do Ponderosa Cafe, en férrea competencia nocturna por bota-lo xuramento, prexuízo ou ventosidade intestinal máis prominente na vila onde John Wayne perdera as esporas.

Atravesado pola luz vasca no Century Club de Buffalo
Atravesado pola luz vasca no Century Club de Buffalo

Mais as escuras sensacións desatáranse canda a nova serodia do pasamento de Bonnie. De ollar fráxil coma pompa de lavanda, voara en silencio estival cal suave peluxe de dente de león. Quedaba a súa desgarradora poesía, para min descuberta demasiado tarde. E quedaban tamén a empatía e mailas gargalladas totais con que compartiramos Three Billboards Outside Ebbing Missouri entre os Budas do Oriental Theater un sábado de primavera.

Cando un non sabe como deixar parti-la devastación total, só a música telúrica que emana do corazón acode ó rescate; e así, abusando da máscara e mailo espello, a escura noite fíxose máis levadeira. Porque, como Bonnie dixera en Whoosh, “pain is the beginning of understanding”.

Ó outro día, mentres camiñaba en Buffalo á noitiña por Main Street, sentín como as tribulacións de Rebekah curiosamente trouxeran á miña memoria a dor estival de Calatañazor; a escura noite de Hulett, unha vez en Buffalo, por momentos parecía virar en negra sombra. Mais, sentado na barra do Century Club, a conversa xirou en positivo apenas souberon da miña nacionalidade galega. Tódolos alí presentes eran descendentes da diáspora vasco-francesa de Wyoming, moi involucrados no Big Horn Basque Club, e algúns ata nas xuntanzas NABO.

Despois dun tempo a falar de patrias ninguneadas alén mar, virei á dereita e velaí estaba Chuck, peculiar aventureiro hippie, sesenteiro mestre de linguas, e fan de Star Wars e Joseph Campbell a partes iguais. Non lembro como, Chuck axiña botou a falar dun tal Rob, orixinario coma el de Seattle e coa mirada turbia coma auga de pozo negro. E a medida que ía entrando en detalles comezou a invadirme unha inquietante sensación de familiaridade con tan escuro personaxe.

No Spearfish Canyon, camiño de Hulett.
No Spearfish Canyon, camiño de Hulett.

Seica Chuck e Rob coincidiran nun longo teacher retreat en Olympia, no verde estado de Washington. Sen deixarme interrompe-la súa narración, Chuck continuou a tumba aberta, como ensimesmado e sen oírme, o longo e demorado relato sobre o lado escuro de Rob. Os dous afeccionados a recreárense con marihuana nas escuras noites de Seattle, seica os resultados da substancia sobre a perturbada mente de Rob deviñan preocupantes cando no cóctel psicotrópico incluía tamén packs de IPA. 

En paciente silencio, e mentres saboreaba a derradeira coronita, abraiáronme as peculiares filias artísticas de Rob: o Conde de Montecristo e Darth Vader. Que escuridade podería aloxar aquela mente da que eu fuxira semanas antes? Merecería a pena curiosear nos límites da súa cordura ou sería mellor distanciarse de tan inquietantes patoloxías?

Alucinábame que Chuck tivese aturado tanto tempo o ego ferido daquel ser, fantasmal cal burato negro. A longa e escura historia daquela mente atravesara a miña alma coma a luz vasca nocturna do Century Club de Buffalo. Ó día seguinte, comecei a tomar conciencia plena, dixeri-las turbias sensacións daquela noite e asemade a sospeitar que na inmensidade dos ceos estadounidenses, rumbo oeste, asistiría a avatares adicionais da escura mente de Rob.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA