Por Europa Press / Redacción | SANTIAGO DE COMPOSTELA | 11/02/2019 | Actualizada ás 15:27
O PSdeG pide que se reforme o regulamento do Parlamento de Galicia para que se poida "salvar" o "bloqueo" por parte do Partido Popular ás comisións de investigación, mesmo a aquelas que son postas en marcha a iniciativa da oposición.
O portavoz parlamentario do PSdeG, Xoaquín Fernández Leiceaga, lembrou que a última modificación do regulamento da Cámara permite que dúas quintas partes dos deputados poidan crear de forma automática unha comisión de investigación por lexislatura.
A pesar de que a Cámara abriu esta posibilidade para que os grupos minoritarios puidesen convocar un órgano destas características, Leiceaga denunciou que o Partido Popular "decidiu de 'facto' bloquear" o seu plan de traballo.
"Esta foi a estratexia escollida polo grupo maioritario para desactivar a comisión de investigación sobre os recortes na sanidade", manifestou Leiceaga, que reclamou unha cota de comparecentes para que os grupos poidan evitar "o bloqueo e a censura".
En concreto, o PSdeG pide que os deputados impulsores das comisións de investigación poidan propor ao mesmo número de comparecentes que o de parlamentarios impulsores da posta en marcha do órgano.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.