A Xunta presume de polo aeroespacial ante expertos nacionais e internacionais en Málaga
Desde o goberno galego destacan este polo como unha iniciativa estratéxica que permite gañar competitividade e coñecemento.
Por Europa Press / Redacción | SANTIAGO DE COMPOSTELA | 13/02/2019 | Actualizada ás 19:21
A Xunta está a presentar o polo aeroespacial de Galicia ante expertos nacionais e internacionais no marco do Foro Transfire, un encontro profesional e multisectorial para a transferencia de coñecemento e tecnoloxía que se celebra en Málaga ata o xoves.
En concreto, a directora da Axencia Galega de Innovación (Gain), Patricia Argerey, participou este mércores nunha mesa redonda dedicada á 'Civil UAVs Iniatiative', xunto co director de vehículos aéreos de Indra, Francisco Javier Barcala, o director de I+D de Babcock, José Luís Saiz, e o director de estratexia de Boeing I+D Europa, Eduardo Carrillo.
Argerey destacou este polo como unha "iniciativa estratéxica" que está a permitir a Galicia "gañar competitividade e crecemento económico e xerar capacidades industriais e sinerxías" de coñecemento entre centros de investigación e empresas.
De feito, explicou, este proxecto está a mobilizar 164 millóns de euros de fondos público-privados, hai xa máis de 50 axentes traballando nel con contratos, entre empresas e centros de coñecemento, e está previsto que traballen nel case 500 persoas ata 2020. Argerey destacou tamén que só existen outras tres iniciativas iguais a nivel internacional, en Estados Unidos e Canadá, e ningunha similar en Europa.
O debate centrouse tamén no "efecto tractor" que está a producir a participación de actores como as multinacionais Indra, Babcock e Boeing no ecosistema galego de innovación, a través das subcontratacións de axentes galegos e da transferencia de coñecemento e talento galego ao mercado.
Doutra banda, subliñouse a visión a medio e longo prazo de abordar desenvolvementos tecnolóxicos que permitan xerar produtos e servizos baseados en vehículos non tripulados que poidan facer uso do espazo aéreo da maneira máis ampla posible e que sexan certificables con criterios equivalentes aos que se empregan para as aeronaves tripuladas.
Neste marco, Indra presentou as vantaxes dos dous vehículos desenvoltos no marco da iniciativa, o Targus, orientado a materias de vixilancia, e o primeiro USV marítimo, opcionalmente tripulado para tarefas de vixilancia de pesqueiras, ambiental e protección de portos, bote auxiliar para buques da frota ou loita contraincendios, entre outros.
Babcock, pola súa banda, explicou a aposta da compañía por situar en Galicia as súas capacidades en tecnoloxías en vehículos non tripulados e presentou o seu helicóptero non tripulado de 25 quilos, o LUA, así como os sistemas expertos desenvolvidos centrados en áreas como emerxencias ante incendios forestais, vixilancia marítima e ordenación do territorio e recursos naturais. Por último, Boeing presentou a súa solución para a integración de aeronaves autónomas en espazos aéreos compartidos.
