Villares descarta unha coalición como a defendida por Anova, EU e Podemos, porque sería repetir "erros"
O Consello das Mareas proporá ao BNG e ao PSdeG un gran pacto progresista para o Senado. A proclamación definitiva dos candidatos saídos das primarias será o 13 de marzo.
Por E.P. | SANTIAGO DE COMPOSTELA | 16/02/2019 | Actualizada ás 15:53
O portavoz de En Marea, Luís Villares, non quixo "dar por feito" a ruptura da formación, a pesar dos anuncios de Anova, EU e Podemos de impulsar un diálogo alternativo, pero avanzou que a formación será "un partido", unha formación propia. Rexeita así a "vella fórmula" da "coalición", o gran "erro" das pasadas eleccións que lles impediu contar cun grupo propio no Congreso e polo que apostan as outras tres formacións.
No mesmo día no que Anova, EU e Podemos anunciaron que impulsarán un proceso de diálogo para recuperar a unidade popular, Luís Villares non quixo referirse en concreto a esta suposta ruptura, a pesar de ser preguntado en varias ocasións polos medios de comunicación ao final do Consello das Mareas celebrado en Santiago.
"Temos que aprender dos nosos erros, e foi un erro presentarse cunha fórmula xurídica que non permitise ter grupo parlamentario propio, os que estean a falar de reeditar a coalición saben que imos repetir o erro, e sábeno", recalcou.
É máis, Villares enarborou a "grandeza" de En Marea e reivindicou que se trata dun "espazo político valente, coherente e consecuente" que se presentará como partido de adscrición individual, deixando "atrás os corpiños ríxidos", porque "o que suma non é a suma de siglas senón a suma de proxectos".
Reivindica así En Marea como "espazo que nace para aglutinar todas as sensibilidades", pero deixando caer que dará "preeminencia ás persoas e non ás cúpulas". Con esta fórmula xurídica "gañadora", os inscritos non terán que pertencer a ningunha outra formación nin serán os líderes que as encabezan os que tomen decisións, subliñou, en referencia clara á situación do Congreso, na que os seu cinco deputados se integraron en Unidos Podemos.
Cuestionado sobre Anova, Esquerda Unida ou Podemos replicou que ten "contactos fluídos", aínda que si admitiu que se trata dunha relación non exactamente recíproca: "Hai máis intención pola nosa banda que pola contraria".
Aínda así, no día no que presentaron o seu calendario de primarias para elixir os candidatos cos que concorrer ás eleccións xerais do 28 de abril, fixo un chamamento a "todos a que participen", "arrimen o ombro para conseguir unha candidatura grande e gañadora", "non hipotecada nin subordinada" a outras forzas políticas en momentos de negociación, que era "o que buscaba xa a cidadanía en 2016".
"GRAN PLATAFORMA PROGRESISTA CON PSDEG E BNG"
E como novidade, anunciou que proporá a PSdeG e a BNG unha "gran plataforma progresista" para presentarse ao Senado. Unha fórmula específica para a cámara alta, para a que existen listas abertas e na que o partido máis votado obtén o 75% da representación fronte ao 25% do minoritario. Trataríase de "facer da necesidade virtude e agrupar forzas".
Realiza un chamamento así a articular un espazo "progresista", ante a "promiscuidade política do PP con Vox", como demostrou, ao seu xuízo, que "en Galicia se negase a condenar pactos con forzas políticas machistas", "xenófobas ou supremacistas", aínda que "Galicia nin é machista, nin irresponsable, nin abolicionista".
E de cara ás eleccións europeas subliñou que En Marea ten a Galicia como "a súa realidade nacional de referencia", porque senón serían todos "Esquerda Unida ou Podemos", "insuficientes" para entender a "realidade" galega.
CALENDARIO DE PRIMARIAS
No Consello das Mareas, no que non participaron os críticos a pesar de estar convocados, aprobouse o calendario das primarias para as eleccións xerais, que fixa a proclamación definitiva para o 13 de marzo.
Entre o 25 de febreiro e o 28 estará aberto o prazo para a presentación de candidatos, o 3 de marzo será a proclamación dos candidatos e a campaña prolongarase do 4 ao 7 dese mes. As votacións terán lugar entre o 8 ás 09,00 horas e o 10 ás 23,59h, coa proclamación provisional o 11.
Coa vista posta nas candidaturas, Villares eloxiou á deputada Alexandra Fernández, a única dos cinco do Congreso que seguiu as directrices da dirección galega de votar en contra dos orzamentos, resaltando que "non habería mellor candidata" para liderar a lista de Pontevedra.
