Seiscentos alumnos de Secundaria poderán participar no programa de intercambio con países da UE
Educación dobra o número de centros que poden optar a esta actividade dirixida a estudantes de 3º e 4º da ESO: de 15 a 30
Por E.P. | SANTIAGO DE COMPOSTELA | 16/02/2019 | Actualizada ás 18:07
A Consellería de Educación, Universidade e Formación Profesional dobrou este ano o número de centros que poderán participar no programa de intercambio de alumnado para centros públicos cos doutros países da Unión Europea (UE), EduExchanges. Poderán inscribirse na actividade, entón, 30 centros (antes eran 15) e ata 600 alumnos.
Tal como sinalou a Xunta nun comunicado, o obxectivo desta iniciativa é que o alumnado "mellore as súas competencias en linguas estranxeiras" nun contexto "de convivencia diaria nun ámbito familiar".
A convocatoria está dirixida a alumnado de terceiro e cuarto de ESO, e nela poden participar todos os centros de ensino públicos galegos que desenvolvesen algunha iniciativa deste tipo, ou teñan previsto facelo, entre o 1 de xaneiro e o 30 de xuño deste ano.
Cada centro seleccionará un máximo de 20 candidatos e recibirá unha axuda económica da Consellería destinada a sufragar os gastos derivados do intercambio, que ascenderá ata 7.000 euros.
Así, a Xunta subliñou que os centros deberán ocuparse "de todos os aspectos organizativos relacionados co intercambio", o que inclúe "a planificación das actividades educativas e extraescolares que consideren".
Pola súa banda, o Goberno autonómico lembrou que as familias do alumnado participante no proxecto "comprométense a recibir na súa casa a un alumno doutro país" e tamén "se responsabiliza do seu aloxamento e manutención".
Esta iniciativa está enmarcada na Estratexia Galega de Linguas Estranxeiras 2020, Edulingüe, "para o fomento e a mellora do plurilingüismo no ensino non universitario".
