Por Europa Press / Redacción | SANTIAGO DE COMPOSTELA | 16/02/2019 | Actualizada ás 18:41
O 10% das explotacións mineiras en activo en España, ao redor de 3.600, están en Galicia, que conta con 360 na actualidade. Así se puxo de manifesto no IV Encontro de ContraMINAcción, desenvolvido en Santiago de Compostela con colectivos galegos e do resto de España e de Portugal.
O encontro estivo organizado pola Rede contra a Minaría Destrutiva en Galicia, que integra a entidades contra as minas de Terra Chá, a Plataforma Mina Touro-O Pino Non ou algunhas pola defensa de Corcoesto e Bergantiños, entre outras. Á cita acudiron organizacións e plataformas de Cartagena, Salamanca, Cáceres, Ávila, Zamora, Asturias, Sevilla e de Boticas (Portugal).
Os participantes alertaron do "boom" da minaría a nivel global, coa "multiplicación exponencial de solicitudes de prospección e extracción", derivada do "incremento imparable do consumo" mundial.
No encontro advertiuse de que, nalgúns casos, as empresas mineiras "explotan xacementos cada vez máis dispersos que precisan de métodos de extracción máis agresivos" e, noutros, conseguen concesións "só para especular".
Ante o que cualifican como "ameaza global" a outras actividades económicas como a agrogandeira e á saúde das persoas, acusan os gobernos -de "esquerdas ou de dereitas"- de poñerse ao lado dos intereses das empresas mineiras.
Neste contexto, o Encontro celebrado en Santiago expúxose como unha primeira toma de contacto para que os distintos colectivos colaboren para "plantar cara" a unha "actividade absolutamente insustentable".
Participaron a Asociación de afectados por metais pesados (Cartagena), Coordinadora Non á Mina de Uranio (Salamanca), La Raya sin Minas (Valencia de Alcántara, Cáceres), No a la Mina en el Valle del Corneja (Ávila), No a la Mina en la Sierra de Ávila (Ávila),No a la Mina en la Sierra de Yemas (Ávila), No en mi Tierra (Zamora), Oro No (Asturias), Plataforma Ciudadana Sierra de Moron (Sevilla), Plataforma Sierra de Gata Viva (Cáceres), Salvemos la Montaña (Cáceres), Salvemos las Villuercas (Cáceres) e Unidos em Defesa de Covas do Barroso UDCB (Portugal).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.