A compra de vivenda para un solteiro en Galicia acapara o 21% dos seus ingresos mensuais

Un estudo do portal inmobiliario casaktua.com analizou  en que comunidade autónoma é máis factible que unha persoa poida adquirir un inmoble, tras revelar que o 28% dos españois que van mudarse proximamente queren facelo en solitario. Se ben o 33% aposta por alugar, a porcentaxe restante prefire mercar unha vivenda, pero o informe revela que, en Galicia, os compradores deberán destinar á hipoteca un 21% dos seus ingresos.

Tendo en conta que a fins de 2018 o custo medio da vivenda se situouen 1.337€/mes, este portal inmobiliario quixo facer unha comparativa entre comunidades. Castela-A Mancha e La Rioja son as rexións onde os solteiros poden comprar unha vivenda dunha forma máis cómoda, xa que a hipoteca acapararía o 17% dos seus ingresos.

Seguiríanlles Estremadura (20%), Aragón (20%), Castela e León (20%), Rexión de Murcia (21%), Galicia (21%), Asturias (22%) e Comunidade Valenciana (22%).

Pola contra, Baleares, cun 42% do salario dedicado ao pago da vivenda, Comunidade de Madrid (32%) e Cataluña (31%), serían as comunidades menos alcanzables para adquirir un inmoble en propiedade en solitario.

Á alza dos prezos súmase que as condicións dunha entidade bancaria á hora de conceder un crédito en solitario son máis restritivas. Ao tratarse dun só titular, a garantía de pago redúcese á metade, polo que a necesidade de contar cun posto laboral estable e dispor de ingresos suficientes é maior.

Por este motivo, recoméndase que as cotas hipotecarias non superen o 30% do soldo neto. Neste sentido, a Axencia Tributaria sitúa o salario medio neto en España en 19.172 euros (1.598euros /mes). Por tanto, a porcentaxe mensual destinado ao pago dunha vivenda tipo de 100 metros cadrados sería do 25%.