Por Europa Press / Redacción | SANTIAGO DE COMPOSTELA | 19/02/2019 | Actualizada ás 14:38
O portavoz de En Marea, Luís Villares, reivindicou este martes o partido instrumental como un "magnífico instrumento" que está "ao servizo daqueles que o crearon", en referencia a formacións como Anova, EU, Podemos ou as mareas municipalistas da Coruña e Santiago, que agora piden configurar unha coalición electoral para as xerais do próximo 28 de abril.
Unha proposta que rexeita a dirección de En Marea que encabeza Luís Villares quen, a preguntas dos xornalistas na rolda de prensa posterior á xunta de portavoces do Parlamento de Galicia, insistiu en que a unidade debe darse baixo o paraugas do partido instrumental.
"Temos unha ferramenta que é o partido político En Marea, que crearon todos os actores que neste momento compomos o espazo político en Galicia e que está lista para gañar as eleccións", aseverou Villares.
Deste xeito, lembra que foron Anova e os alcaldes da Coruña --Xulio Ferreiro--, Santiago --Martiño Noriega-- e Ferrol --Jorge Suárez-- os que propiciaron, no verán de 2016, a configuración de En Marea como partido instrumental, fórmula á que se sumou Esquerda Unida e que, debido ás diverxencias internas, estivo a piques de provocar que Podemos Galicia concorrese por separado ás últimas eleccións autonómicas.
Por iso, Villares insiste en que a cidadanía "premia a unidade" daqueles que teñen "un pensamento similar" e comparten "valores e principios". "E para poder conseguir iso no ano 2016 creamos este magnífico instrumento que é En Marea", suliñou. "Por tanto, este instrumento está ao servizo daqueles que o crearon", remarcou o maxistrado en excedencia, que afirma que En Marea "ten preparada a súa maquinaria" para as eleccións.
MARTIÑO NORIEGA
O último en sumarse a idea dunha coalición e non dun partido foi o alcalde de Santiago, Martiño Noriega. Con todo foi el, Xulio Ferreiro e Anova, principalmente, os que no verán de 2016, Noriega encabezou, xunto aos 'alcaldes do cambio', os movementos para configurar En Marea como partido instrumental de adscrición individual que trasladase ao ámbito autonómico o modelo das mareas municipalistas.
"Non sei se é pola fórmula do partido instrumental en si mesma ou por determinadas dinámicas que se deron, pero parece que (o modelo de partido instrumental) é o que peor encaixe ten", indicou o alcalde de Santiago e líder de Compostela Aberta, marea que se aliña no sector crítico coa dirección de En Marea que encabeza Luís Villares.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.