Por Europa Press / Redacción | SANTIAGO DE COMPOSTELA | 20/02/2019 | Actualizada ás 18:50
Traballadores de ambulancias protestaron este mércores á saída dun acto do presidente da Xunta, Alberto Núñez Feijóo, en Santiago de Compostela, onde lle esixiron a súa "dimisión".
Centenares de empregados do transporte sanitario de Galicia participaron este mércores nunha manifestación polas rúas de Compostela para reclamar un convenio xusto, logo de tres anos sen el. Demandaron, tamén, a "implicación" da Xunta no conflito por ser "a responsable das concesións".
Ao final da marcha, que saíu da Praza Roxa, os traballadores dirixíronse ao Palacio de Congresos, lugar no que Feijóo participou na clausura do acto con directivos galegos '100 Consellos para o 2019'. Alí, protestaron tras unha pancarta na que se podía ler 'Por un convenio digno e un servizo público de calidade. Ambulancias en loita' ante un cordón policial.
O titular do Goberno autonómico saíu do edificio sobre as 14.45 horas entre berros de 'Feijóo dimisión, ambulancias corrupción' e 'Feijóo escoita, ambulancias en loita'. O presidente meteuse no coche oficial e marchouse do lugar.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.