Por Europa Press / Redacción | SANTIAGO DE COMPOSTELA | 22/02/2019 | Actualizada ás 16:30
A conselleira de Medio Ambiente, Ángeles Vázquez, defendeu a nova Lei galega de residuos e chans contaminados, que se prevé que entre en vigor a partir de 2020, porque suporá aforros económicos pero tamén un freo ao consumo exacerbado. Así o resaltou Vázquez sobre os anuncios realizados este xoves e cos que "Galicia quere ir máis aló", ao adiantar os prazos previstos en Europa.
Entre os "fitos" que recolle a normativa figura o de "frear os desperdicios alimentarios que van crecendo cada ano".
Para iso, o hostaleiro terá "a obrigación de ofrecer aos clientes a oportunidade de levar as sobras" da ración que pedira nun envase que "non sexa de plástico e que, a poder ser, sexa reutilizable". En paralelo, estará prohibida a venda en Galicia de vaixelas de plástico dun só uso (pratos, cubertos...-).
A conselleira puxo en valor unha Lei que superará a actual, "obsoleta" e en vigor desde hai dez anos, e as medidas baseadas no "modelo Sogama" que chega ao 94% dos concellos de Galicia.
"É unha boa medida, por unha banda o hostaleiro é capaz de quitarse os residuos, doutra banda, freamos o consumo exacerbado que envolve á sociedade en si, e xusto cos hostaleiros nod poñemos deberes a administración co pequeno comercio e as grandes cadeas", asegurou.
Trátase de iniciativas que para a titular da Consellería de Medio Ambiente son tanto "ecolóxicas como económicas", porque en termos de "economía circular" calcúlase que en Europa se xeneren en 2030 "3.000 postos de traballo e afórrense 600.000 millóns de euros", cun aforro que en Galicia podería chegar aos "2.000 millóns".
"Falamos de economía circular, de emprego verde e sobre todo de frear o cambio climático que nos vai a afectar a todos e as fórmulas son as que pon encima da mesa Galicia", remarcou.
Aclarou, ante as dúbidas xurdidas, que o "cliente non terá a obriga de coller as sobras" pero os hostaleiros deberán ofrecelas, facilitando que os clientes perdan "a vergoña" que aínda se manifesta á hora de pedir os restos da ración paga.
"Facilitamos que o cliente perda a vergoña e que ese hostaleiro se vexa coa oportunidade de que xa non ten que reciclar el", reiterou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.