A oposición pide que Contas fiscalice os concertos educativos e comedores e o PP di que están "obsesionados"

Os grupos da oposición expuxeron este venres na comisión para as relacións co Consello de Contas recomendacións á memoria de actividades de 2017 que pasaban por fiscalizar, entre outros aspectos, os concertos educativos e os comedores escolares.

O PP rexeitounas (só votou a favor dunha do BNG sobre un proxecto LIFE en Xinzo da Limia, que foi a que saíu adiante xunto a unha do grupo maioritario) ao argumentar que responden "as súas obsesións particulares".

"Ante unha planificación tan intensa e ambiciosa, pouco máis hai que achegar a este traballo. As súas recomendacións responden as súas obsesións particulares (...), que son máis obxecto de debate político que de necesidade real de control financeiro, porque se o fose, Contas así o determinaría", sostivo a deputada Cristina Romero.

A nacionalista Noa Presas advertiu da situación actual da sanidade pública e sinalou que é "o que máis lle preocupa" á sociedade galega nestes momentos.

A socialista Begoña Rodríguez Rumbo denunciou "manipulación" nos medios públicos e tamén pediu unha auditoría da Amtega. Como ela, o parlamentario de En Marea Manuel Lago chamou a atención sobre o nivel do endebedamento, "un clásico".

Pola súa banda, Romeu defendeu o seu "criterio de mínima intervención" ao reivindicar a "independencia e profesionalidade" de Contas. "Moitas das 56 recomendacións que traen xa foron aprobadas ou xa están recollidas no plan", resolveu.