19.000 galegos verán incrementada a súa prestación por dependencia a partir de abril

Un total de 19.000 galegos beneficiaranse dun aumento de entre o 10 e o 75% na súa prestación por dependencia a partir da nómina correspondente ao mes de abril, para o que a Xunta investirá 10 millóns de euros. Así o asegurou este martes a conselleira de Política Social, Fabiola García, que compareceu no Pleno do Parlamento para dar a coñecer as liñas xerais de actuación do seu departamento para o que resta de lexislatura.

En concreto, a conselleira precisou que o aumento das contías por dependencia será dun 10% para aquelas persoas que teñen a súa autonomía limitada e que son coidadas na casa por un familiar e dun 15% na axuda para contratar a un asistente persoal.

No caso das axudas para pagar unha praza nunha residencia, subirán un 20% no caso das dependencias de grao I e III e un 75%, unha alza "sen precedentes", para as dependencias de grao II.

Fabiola García enmarcou esta medida na "aposta" da Xunta por "garantir que todos os galegos teñan dereito a escoller libremente como facerse maiores", un ámbito, o da terceira idade, no que tamén destacou o reforzo de prestacións como o Servizo de Axuda non Fogar, que multiplicou por dez a súa extensión desde 2009; o programa Xantar na Casa, que leva o menú diario a máis de 1.300 maiores; a posta en marcha das primeiras 30 Casas do Maior, que serán o dobre ao final da lexislatura; ou a implantación do 'cohousing' como alternativa residencial para persoas con dependencia moderada.

Así mesmo, como novidade, indicou que, a partir das próximas semanas, o proxecto RedMay achegará servizos de oftalmoloxía e podoloxía, apoio persoal e atención ao Alzhéimer a 20 municipios pequenos da comunidade.

Tamén no ámbito da dependencia, Fabiola García destacou que en dous anos se conseguiu o obxectivo de alcanzar os 60.000 dependentes atendidos, catro veces máis que hai unha década.