Maiores e novos dialogan sobre as vivencias nas escola
Afundación celebra en Betanzos o seu encontro interxeracional «Falamos da escola».
Por Galicia Confidencial | Betanzos | 28/02/2019 | Actualizada ás 11:34
Afundación, a Obra Social de ABANCA, desenvolve en Betanzos, coas persoas voluntarias do Espazo +60 Afundación na localidade e estudantes do IES Francisco Aguiar, o seu programa interxeracional denominado «Falamos da escola», no que maiores voluntarios e alumnas e alumnos de centros escolares de toda Galicia dialogan sobre as vivencias ao longo da etapa escolar.
A iniciativa enmárcase na liña estratéxica «O valor da experiencia», da Área de Envellecemento Activo de Afundación, que ten como obxectivo ampliar as oportunidades de participación e de contribución social das persoas maiores, aproveitando o seu talento e a súa experiencia vital e profesional, a través de programas interxeracionais e de voluntariado, que beneficien outros grupos da sociedade.
Estes encontros teñen lugar este xoves 28 de febreiro, de 9.35 a 13.25 h, e o venres 1 de marzo, de 11.45 a 13.25 h no IES Francisco Aguiar de Betanzos (avda. da Coruña, 13), con dous grupos de estudantes, que poñen en común cos maiores as súas opinións e investigacións sobre a evolución da escola.
