Un expolicía de Mugardos nega cometer falsidade documental coas fotos incorporadas a un parte
O seu servizo requiriuse para sacar as instantánteas dun taboleiro de anuncios sobre supostos partes facultativos dunha persoa
Por E.P. | A CORUÑA | 06/03/2019 | Actualizada ás 13:43
Un expolicía de Mugardos (A Coruña) negou cometer falsidade documental coas fotos incorporadas a un parte que realizou tras un servizo requirido polo alcalde, segundo expuxo no xuízo celebrado na Audiencia Provincial da Coruña.
Ao comezo, a súa letrada alegou que un xulgado xa ditara, en xaneiro de 2014, un auto procedendo ao sobresemento provisional da causa e asegurou que adquirira "firmeza" por non existir, segundo a súa exposición, recursos da Fiscalía.
Con todo, tanto o Ministerio Público como o tribunal -da sección primeira- apelou á existencia duns autos para rexeitar esta petición, na que se incluía suposta nulidade do proceso e de vulneración de dereitos fundamentais.
Finalmente celebrouse o xuízo por uns feitos que se remontan a maio de 2008, cando o daquela axente foi requirido polo alcalde para que se desprazase a unha panadaría para facer unhas fotografías.
SUPOSTO CAMBIO DE FOTOS
O obxectivo era deixar constancia de que no taboleiro de anuncios do establecemento se achaban expostos, xunto á sentenza dun xuízo de faltas, partes facultativos de asistencia médica que incluían datos reservados dunha persoa, segundo recolle o Ministerio Público no seu escrito dos feitos. A Fiscalía acúsao de redactar un informe no que incluíu fotografías distintas das obtidas cando foi requirido par o servizo.
No seu escrito de cualificación provisional dos feitos, o Ministerio Público solicita que sexa condenado a catro anos e medio de prisión e á inhabilitación para o exercicio de calquera emprego ou cargo público durante cinco anos.
O expolicía precisou que redactou "un parte", non un informe, e que ao local acompañouno o matrimonio que requeriu o servizo. Segundo o seu relato, xa no establecemento, estes iniciaron unha discusión co dono da panadaría, motivo polo que, unha vez realizadas as fotos, marcharon. No entanto, recoñeceu non incorporar esta discusión no seu parte.
"Eu fixen as fotos dos papeis que había alí", expuxo a preguntas da Fiscalía. "Son as fotos que había no taboleiro de anuncios ese día", engadiu o exaxente, que traballou durante 30 anos en Mugardos e que leva xa seis anos retirado.
