Traballadores de ambulancias encérranse para protestar polos avances "insuficientes" tras días de folga
Advirten de que os paros se converterán en indefinidos o próximo 20 de marzo se non se chega a un acordo
Por Europa Press / Redacción | VIGO | 07/03/2019 | Actualizada ás 13:42
Traballadores de ambulancias das sete áreas sanitarias galegas encerráronse nos despachos das Xerencias de Xestión Integradas tras tres días de folga consecutivos. O paro vai dirixido a demandar un novo convenio colectivo que "garanta unhas condicións laborais dignas", segundo trasladou CIG, CC.OO. e UXT. Advirten que, polo de agora, os avances acadados nas negociacións non son suficientes.
En concreto, en Vigo, no marco dun acto ao que asistiron un centenar de persoas, o delegado de CIG en Ambuibérica e membro do comité de folga, Alberto Cedeira, detallou a Europa Press que non se produciu unha actualización salarial de acordo co Índice de Prezos de Consumo (IPC) desde o vencemento do anterior convenio, en decembro de 2015.
Ademais, a actualización das retribucións de acordo co IPC non se fará efectiva ata novembro deste ano, segundo a proposta da patronal. Mentres, a subida salarial sobre este índice farase efectiva en 2020. A esta situación, súmase a débeda dunha paga extra de 2011 que, segundo a proposición da patronal, aínda non se retribuiría este ano aos empregados das ambulancias.
O representante da CIG de Transportes na comarca de Vigo, Carlos Martínez, sinalou que, debido a estes motivos, os traballadores acudiron "masivamente" ás folgas diarias realizadas desde este luns, que, se non se chega a un acordo, converteranse nun paro indefinido a partir do día 20 de marzo. Tamén concretou que os servizos mínimos fixados polo Executivo autonómico foron do 100 por cen no caso do servizo urxente e de en torno ao 70 no non urxente.
Adicionalmente, Alberto Cedeira, que tamén é representante da CIG na mesa de negociación do convenio, achacou a situación denunciada ao feito de que a Xunta permitise acceder ao concurso a unha empresa que presentou unha oferta económica inferior á fixada, así como ao aumento da demanda do servizo urxente (061) e non urxente.
REUNIÓNS
O delegado de Unión Xeral de Traballadores (UXT) e representante da mesa negociadora do convenio, Francisco López, avanzou que este xoves terá lugar unha reunión coa patronal que, inicialmente, se fixara para o próximo día 13.
Cerdeira lembrou que o pasado 22 de febreiro xa se celebrou un encontro co Consello Galego de Relacións Laborais, a Xunta e a patronal. Nesa xuntanza a Administración comprometeuse a licitar un contrato para o transporte urxente a mediados de marzo -que entraría en vigor a finais deste ano-. No entanto, segundo engadiu, non se acordaron solucións para o servizo non urxente cuxo sobrecusto "non asume" a Xunta, segundo recalcou o representante sindical.
Así mesmo, os traballadores de ambulancias da área de Santiago detallaron nun comunicado que se encerraron no Hospital Clínico Universitario de Santiago (CHUS), dado que consideran que os avances alcanzados nas negociacións non son suficientes. Así, empregados da área sanitaria da capital galega incidiron en que non se chegou a un acordo en relación a aspectos como os contratos en prácticas e a prevención de riscos laborais.
