O BNG e o PSdG critican a Feijóo por "non entender" a importancia da loita das mulleres

BNG e PSdeG manifestaron o seu rexeitamento á postura do Goberno galego ante este 8 de marzo. Acusan a Feijóo de non acabar de entender a relevancia da loita das mulleres, nun contexto de precaridade laboral e discriminación social. 

A portavoz nacional do BNG, Ana Pontón, criticou o presidente da Xunta, Alberto Núñez Feijóo, e ao seu Goberno, de pensar "que a igualdade é porse un lazo lila na solapa" o 8 de marzo, Día internacional da Muller. Os restantes 364 días do ano "ou non fai nada ou lexisla en contra das mulleres", lamentou Pontón en declaracións aos xornalistas tras unha reunión con traballadoras de empresas teleoperadoras. Por iso, esixiulle actuacións para tratar de "frear" a precariedade laboral das mulleres, que se materializa, entre outras cuestións, en forma de deslocalización neste ámbito.

Ademais, fixo un chamamento para dar un "golpe de efecto nas rúas" e "que quede claro o sentir maioritario"; "que non se vai a permitir nin un só paso atrás" nos dereitos das mulleres.

REUNIÓN

Pontón mantivo este encontro para coñecer de primeira man as problemáticas do sector das teleoperadoras, "moi importante" para Galicia e para Vigo, ademais de "moi feminizado e precarizado". Respecto diso, reivindicou "o importante traballo que fan" e que é "moito máis cualificado do que moitas veces se pensa". "Viven unha situación de precariedade da precariedade, porque cada vez danse máis contratacións de ETT, co que significa a perda de dereitos, peor salario e peores condicións laborais", censurou a líder nacionalista.

Nunha cidade que elevou a "emblema feminista", advertiu de que un sector "tan precarizado" necesita "alternativas". Así, chamou a atención sobre que existen "moitas razóns para saír ás rúas" a "loitar contra a precariedade e pedir o fin das contrarreformas que a quen máis precarizan é ás mulleres, porque xa tiñan peores condicións laborais.

"OS GOBERNOS NON TOMARON NOTA"

Por último, Pontón recalcou que, aínda que o pasado 8 de marzo foi "histórico", "os gobernos non tomaron nota". Insistiu, pois, na necesidade de "parar os pés a esa derechona".

Do mesmo xeito se pronunciou tamén o líder do PSdeG, Gonzalo Caballero, nunha rolda de prensa en Santiago de Compostea. Na súa intervención, censurou que Feijóo "non foi capaz de entender a importancia da loita pola igualdade das mulleres" a pesar de ser patente un contexto no que, segundo advertiu, as mulleres galegas cobran de media un "27%" menos que os homes. E engadiu: oito de cada dez contratos parciais son a mulleres e a representación feminina nos postos de dirección non alcanza o 40%.

Así mesmo, criticou que recortase en axudas de "apoio á conciliación ou á igualdade" e lembrou que o PPdeG minorizou o ano pasado o impacto que a mobilización do 8 de marzo ía ter. "A dereita marchou desbordada do 8 de marzo de 2018 porque se atopou coas rúas cheas de xente defendendo a igualdade", apuntou.

Nese sentido, chamou a todos os galegos a participar este venres nas distintas mobilizacións convocadas en toda a comunidade en defensa dunha "sociedade máis igualitaria" e fronte a unha ultradereita que "pon en risco" os avances sociais e o compromiso feminista, do que fixo gala aludindo ás candidaturas do seu partido.

Ademais, preguntado polos xornalistas sobre a utilización de termos como "feminazi" no debate por parte dalgunhas forzas políticas de ultradereita, Gonzalo Caballero mostrou o seu rexeitamento a "calquera tipo de denominación que busque estereotipos que non permiten construír unha sociedade máis xusta".