Segue crecendo o prezo das vivendas
Subiu en Galicia un 0,5% no último trimestre de 2018.
Por Europa Press / Redacción | A CORUÑA | 08/03/2019 | Actualizada ás 17:53
O prezo da vivenda subiu un 0,5% no cuarto trimestre de 2018 en relación ao terceiro trimestre do mesmo ano, segundo os datos publicados este venres polo Instituto Nacional de Estatística (INE) sobre o Índice de Prezos de Vivenda (IPV).
A taxa anual deste índice mantívose en Galicia no 4,1 por cento. A nivel estatal, a variación anual do Índice de Prezos de Vivenda (IPV) no cuarto trimestre de 2018 diminuíu seis décimas e situouse no 6,6 por cento.
En Galicia, o prezo da vivenda nova subiu un 3% no cuarto trimestre do ano pasado, mentres que a de segunda man fíxoo un 0,1%. A nivel estatal, o prezo da vivenda libre aumentou un 0,4%, 1,8 puntos porcentuais menos que no trimestre anterior. Por tipo de vivenda, o prezo da vivenda nova subiu no cuarto trimestre de 2018 un 1,2% en taxa intertrimestral, acumulando catro trimestres consecutivos de incrementos.
DATOS POR COMUNIDADES
Por comunidades, a taxa anual do IPV diminúe en nove comunidades autónomas, aumenta en sete e mantense estable na restante. Os maiores descensos prodúcense en Canarias, Comunidade de Madrid e A Rioxa, con baixadas de 1,3, 1,3 e 1,2 puntos, respectivamente.
Pola súa banda, Castela-A Mancha, Aragón e Rexión de Murcia rexistran as maiores subidas, con incrementos de nove, sete e seis décimas, respectivamente.
A nivel estatal, o prezo da vivenda libre subiu unha media do 6,7% en 2018 respecto ao ano anterior, o seu quinto repunte anual consecutivo tras seis anos de caídas e o máis elevado desde o exercicio 2007.
