Causa Galiza denuncia unha "agresión fascista" en Ferrol a un dos seus militantes
O parte de lesións recolle fracturas óseas na vítima, tras ser agredida por un grupo de 8 a 10 persoas, segundo a organización.
Por Galicia Confidencial | Ferrol | 10/03/2019 | Actualizada ás 16:40
A organización independentista Causa Galiza denunciou na noite deste sábado pasado unha "agresión fascista" a un dos seus militantes en Ferrol, por parte dunha decena de individuos.
Segundo relata Causa Galiza, produciuse unha "agressom fascista a um militante da nossa organizaçom por parte de 8-10 indivídios na comarca de Trasancos".
O suceso, indican, produciuse na noite do pasado xoves, cando un militante de Causa Galiza —F. J. M.— foi "brutalmente agredido, provocando-lhe várias fraturas e fisuras óseas na cabeça". Lesións das que hai proba médica, xa que existe un parte de lesións, no que se "evidencia o selvagismo e a intencionalidade última dos agressores", apunta a organización.
Causa Galiza anunciou que xa se interpuxo unha denuncia xudicial e avanzou que desenvolverá nos próximos dias as "iniciativas judiciais, informativas e propagandísticas necessárias para impedir que a açom criminosa deste grupo fascista fique impune e evitar a repetiçom de situaçons como as vividas nesta semana".
Tamén advirte da súa "mais absoluta indisposiçom a permitir a 'normalizaçom' deste tipo de acontecimentos e da necessidade dumha resposta ampla e plural ao crecente despontar de incidentes e agressons provocados polo fascismo espanhol nas ruas da Galiza".
Este xornal contactou co agredido, quen decidiu non facer declaracións debido ao seu actual estado trala agresión.
