As desigualdades nos soldos de Inditex: o primeiro executivo gaña 464 veces máis ca os empregados
Un 27% dos traballadores da téxtil teñen contrato temporal, por detrás de ACS (66%) e Acciona (29,2%), segundo un estudo
Por Europa Press / Redacción | Santiago de Compostela | 12/03/2019 | Actualizada ás 13:52
Inditex é a empresa do Ibex 35 cunha maior brecha salarial entre o soldo do máximo representante e a retribución media dos seus empregados: o primeiro executivo gaña 463,8 veces máis ca os traballadores. Así o indica o informe 'Evolución de indicadores de bo goberno nas empresas do Ibex 35' realizado pola Fundación 1º de maio en colaboración coa Secretaría Confederal de Políticas Públicas e Protección Social de CC.OO.
Desa análise despréndese que os principais executivos do Ibex 35 gañaron en 2017 unha remuneración media que foi 86,6 veces máis elevada que a media percibida polo seu persoal empregado, un dato bastante por debaixo do de Inditex pero que, aínda así, supón un incremento do 8% en comparación co ano 2016.
Entre os cocientes máis elevados tamén se atopan Acciona (356,2 veces máis), Abertis (278,3) e Indra (211,3). No lado contrario, empresas como Aena (3,4), Bankia (7,9) e Rede Eléctrica (12,7) son as compañías nas que a distancia entre o salario medio do primeiro executivo e da media dos empregados é menos elevada.
En concreto, do informe extráese que nun total de 21 empresas analizadas aumentouse a distancia entre a retribución do primeiro conselleiro e a retribución media, mentres que noutras 13 empresas se reduciu. Así mesmo, o estudo apunta que as empresas do Ibex 35 presentaron unha remuneración agregada dos seus primeiros executivos de 151,3 millóns de euros en 2017, o que supón un incremento do 9,2% en comparación con 2016.
Por empresas, as retribucións máis elevadas dos primeiros directivos déronse en 2017 en Acciona (14,2 millóns de euros), Abertis (11,7 millóns), Inditex (10,7 millóns) e Banco Santander (10,6 millóns).
Por outra banda, os custos de persoal das empresas do Ibex 25 alcanzaron os 72.400 millóns de euros en 2017, o que supón un incremento do 4,3% con respecto a 2016, un total de 2.900 millóns de euros máis en termos brutos. Os custos de persoal máis elevados déronse no Banco Santander (12.000 millóns), ACS (7.600 millóns), Telefónica (6.900 millóns) e BBVA (6.500 millóns de euros). En cambio, os máis reducidos rexistráronse en Colonial (28 millóns), Merlin (71 millóns), Mediaset (105 millóns) e Cellnex (107 millóns de euros).
De forma máis concreta, as empresas do Ibex 35 pagaron 48.800 millóns de euros en concepto de soldos e salarios en 2017, o que supuxo un incremento do 7,7% en comparación co pago en 2016. Por empresas, Banco Santander (8.300 millóns) é a que ten a partida máis elevada neste concepto, seguida de ACS (5.600 millóns) e BBVA (5.200 millóns de euros).
Por outro lado, as cotizadas do principal índice español destinaron ao pago das cotizacións sociais uns 8.400 millóns de euros en 2017, o que supón un incremento do 5,3% en comparación co ano precedente.
CASE 1,5 MILLÓNS DE EMPREGADOS
Respecto dos cadros de persoal, o estudo pon de relevo que un total de 1,43 millóns de persoas traballan nas empresas do Ibex 35. Entre as empresas con maior número de persoas empregadas destaca Banco Santander, seguido de ACS, Inditex, BBVA e Telefónica.
Segundo o estudo, o 18,6% das persoas empregados tivo un contrato temporal en 2017. Por compañías, destaca ACS, cunha porcentaxe do 66%; Acciona (29,2%) e Inditex (27%), onde a porcentaxe de traballadores cun contrato temporal é superior ao 25%. Tendo en conta o xénero, as mulleres representaron o 43,7% das persoas empregadas no conxunto das empresas do selectivo. Por idade, a maior parte dos persoais concentráronse nas idades comprendidas entre os 30 e os 50 anos (66%).
Ademais, o informe sinala que só 23 empresas do total das integradas no Ibex 35 informaron da súa contribución fiscal en 2017, que ascendeu a 88.800 millóns de euros. Segundo CC.OO., a maior parte das empresas (20 empresas) diferenza entre os impostos soportados directamente (30.400 millóns) e os impostos recadados (56.000 millóns de euros), "sendo maior o volume de impostos recadados que soportados".
O informe foi presentado polo responsable de políticas públicas e protección social de CC.OO, Carlos Bravo, e os técnicos Mario Sánchez e Luís de la Fuente.
