Arrinca o Observatorio de Acción Voluntaria para fomentar a "eficacia" nun ámbito no que Galicia é "líder"
Por E.P. | SANTIAGO DE COMPOSTELA | 15/03/2019 | Actualizada ás 14:27
O Consello Galego de Acción Voluntaria celebrou este venres a súa primeira reunión do ano, na que, entre outras cuestións, botou a andar ao arranque do Observatorio Galego de Acción Voluntaria, un organismo que busca fomentar "a maior eficacia" das políticas e iniciativas neste ámbito no que Galicia é "líder".
Así o explicou a conselleira de Política Social, Fabiola García, que participou no inicio desta reunión xunto coa directora xeral de Xuventude, Cristina Pichel, que preside por primeira vez este órgano.
Na súa intervención, Fabiola García destacou que Galicia, con máis de 8.000 persoas, é unha das comunidades españolas con máis voluntarios, e dispón, ademais, de máis de 900 entidades de acción voluntaria.
Do mesmo xeito, lembrou que é a única comunidade española que conta cun certificado de voluntariado recoñecido a nivel europeo e comprometeu o apoio da Xunta para que Galicia "siga sendo unha comunidade de referencia" neste ámbito.
Tras agradecer o "traballo impagable" que fan os voluntarios en distintos ámbitos, como o dos maiores, Fabiola García asegurou que o Observatorio axudará a "potenciar" este ámbito, promovendo a "eficacia e a eficiencia" das políticas de acción voluntaria e mellorando a "necesaria coordinación entre a Xunta e as entidades" do sector.
Entre os seus obxectivos está o de crear unha guía de boas prácticas e elaborar informes sobre o impacto do voluntariado, profundar no plan de acción e favorecer a participación de distintos ámbitos.
