Detido un mozo tras dar unha patada ao seu pai e roubarlle o bolso a súa nai

Axentes da Policía Nacional de Ourense detiveron a un mozo como presunto autor dun delito de roubo con violencia na zona centro tras dar unha patada no estómago ao seu pai e arrincarlle o bolso á súa nai despois de negarse esta a darlle diñeiro.

Segundo informou a Policía Nacional, os feitos comezaron na mañá do 15 de marzo ás 7,20 horas cando se recibiu unha chamada na Sala 091 na que unha persoa manifestou que tiña problemas co seu fillo.

Axentes do Grupo de Seguridade Cidadá dirixíronse ao lugar e, unha vez alí, non localizaron nin ao presunto autor nin á vítima, polo que comunicaron este feito á Sala 091 para que realizase as xestións oportunas. Ademais, procederon á procura do presunto autor pola zona, que non foi localizado.

A Sala 091 comunicou que a vítima e o seu home, proxenitores do presunto autor do roubo, correron detrás do seu fillo para tentar recuperar o bolso, feito que lograron, pero non a carteira, xa que o fillo sacouna e gardouna nas súas roupas á vez que tirou o bolso á calzada mentres fuxía.

O pai do mozo recuperou o bolso, pero non a carteira coa documentación e 40 euros en efectivo. Ademais, o proxenitor confirmou que o mozo lle propinou unha patada no estómago a el e rouboulle o bolso á súa nai á vez.

A Policía explicou que o presunto autor é "un coñecido no ámbito policial" e "consumidor de sustancias estupefacientes". Axentes, con esta información, acudiron ao barrio de Covadonga onde o mozo foi localizado pola patrulla, interceptado e sometido a un cacheo preventivo de seguridade, durante o que lle localizaron entre as súas pertenzas a carteira da súa nai e diñeiro en efectivo.

Por este motivo foi detido e trasladado a dependencias policiais para realizar as xestións oportunas. Trátase dun home de 28 anos natural de Ourense, ao que lle constan dúas detencións anteriores. Quedou en liberdade tras pasar a disposición xudicial.