Por Europa Press / Redacción | Santiago de Compostela | 18/03/2019 | Actualizada ás 17:15
O portavoz parlamentario do PPdeG, Pedro Puy, defendeu este luns á presidenta do Congreso, Ana Pastor, xa que, ao seu xuízo, "é difícil atopar unha mellor cabeza de lista para o Partido Popular na provincia de Pontevedra".
Así, respondeu Puy ás críticas cara a Pastor que realizou a Plataforma Vítimas Alvia 04155, que cualificou de "ofensa" que a exministra fose nomeada como cabeza de lista do PP en Pontevedra, xa que, ao seu xuízo, é "a persoa que máis traballou desde as institucións públicas para tratar de ocultar as verdadeiras causas dunha traxedia que acabou coa vida de 80 persoas".
Desta maneira, o portavoz do PPdeG apuntou que as vítimas e as asociacións que as representan "teñen dereito a dicir calquera cousa que estimen conveniente" e "todas as forzas políticas teñen que tratalas con respecto".
Con todo, subliñou que Ana Pastor compareceu na comisión de investigación no Congreso dos Deputados e alí "tivo ocasión de dar resposta a todo o que lle preguntaron", polo que asegurou que "non comparte a opinión" das asociacións de vítimas neste aspecto.
"VOTO ÚTIL"
Noutra orde de cousas, Pedro Puy insistiu este luns en pedir o "voto útil" para o PP nas próximas eleccións xerais do 28 de abril.
Neste sentido, asegurou que a Lei D'Hont nalgunhas provincias podería dar un resultado "curioso" e "posiblemente non buscado", porque se disolve o voto en opcións minoritarias "como ocorre máis veces con outras forzas políticas".
"Espero que aquela persoa que entende que votando a Vox consegue algo positivo en relación coa situación xeral de España, coa campaña chegue a entender que é máis útil votar ao Partido Popular", sentenciou Puy.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.