Por E.P. | SANTIAGO DE COMPOSTELA | 21/03/2019 | Actualizada ás 20:14
O administrador concursal da empresa de Poligal en Narón (A Coruña), Pedro Franco Corrons, informou este xoves ao comité de empresa de que o xulgado do mercantil aprobou o concurso de acredores solicitado polo Grupo Peralada, pero "polo momento" non dá luz verde á proposta de liquidación da fábrica.
Na primeira reunión do administrador concursal cos traballadores, trasladou a súa intención de buscar "unha solución" para a empresa asentada no polígono industrial da Gándara, en Narón, e dedicada á fabricación de filme de polipropileno para o sector da alimentación. E é que os seus propietarios presentaron o pasado 22 de febreiro un concurso de acredores e un Expediente de Regulación de Emprego (ERE) extintivo para os seus 108 empregados.
Segundo fontes sindicais consultadas por Europa Press, o administrador concursal catalán, que foi nomeado por un xulgado da social de Barcelona, cidade na que a empresa presentou o concurso de acredores, tamén lles dixo que o seu obxectivo pasa por realizar un inventario da empresa, ademais do estado de acredores. Para iso conta cun tempo de dous meses, prazo no que deberá presentar un informe final coas súas conclusións. Así mesmo, manifestou á parte social que as nóminas do mes de marzo de todo o persoal están garantidas.
Na súa visita á planta de Narón o administrador estivo acompañado dun avogado laboralista e un enxeñeiro tasador. Durante a tarde deste xoves tamén tiña previsto reunirse con responsables da empresa. Así mesmo, o administrador manterá na mañá deste venres, 22 de marzo, na Coruña, unha reunión de traballo con responsables do Igape. Os representantes farán o propio pola tarde co fin de constituír a mesa para buscar a chegada de novos investidores co fin de evitar o peche da planta, que se instalou no ano 1991.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.