Conde ve un "novo obstáculo" o feito de que a planta de Alcoa na Coruña non poida ir á poxa

O conselleiro de Economía, Emprego e Industria, Francisco Conde, lamentou un ""novo obstáculo" tras comunicar Rede Eléctrica que a multinacional do aluminio non poderá participar na próxima poxa de interrumpibilidade, ao renunciar a prestar o servizo actualmente. 

Respecto diso, opinou que "o Goberno deberá salvar" esta situación, deberá "dar esa resposta" tendo en conta que corresponde ao Executivo central a política enerxética. Neste sentido, o responsable de Economía da comunidade galega tamén se mostrou á espera de que o Goberno central "comunique quen son os investidores interesados" en facerse coas plantas da Coruña e Avilés.

Asemade, acusou o delegado do Goberno, Javier Losada, de "descoñecemento" sobre o traballo que están a impulsar as distintas administracións co obxectivo de atopar unha solución á crise de Alcoa. Así o afirmou, a preguntas dos xornalistas tras reunirse con patronal e sindicatos, despois de que Losada convidase á Xunta a pór en marcha unha mesa sectorial e a deixar de "criticar".

"Hai unha mesa constituída e a Xunta está a traballar de forma construtiva. Colaborando co ministerio. O Goberno sabe que ten na Xunta unha administración responsable pero tamén moi preocupada", incidiu. Deste xeito, lembrou que o estatuto de empresas electrointensivas non recolle "a maior parte de propostas" que trasladaron as compañías e a propia Xunta, nas que, agora, de forma "construtiva", volverá "insistir" en forma de alegacións ao texto.