O presidente do PSdeG cuestiona o sistema de elección de listas tras os cambios en Galicia
Xaquín Fernández Leiceaga recoñece que había que facer o sistema "máis simpel e máis claro".
Por E.P. | SANTIAGO DE COMPOSTELA | 24/03/2019 | Actualizada ás 19:21
O portavoz do grupo parlamentario do PSdeG e presidente da formación en Galicia, Xaquín Fernández Leiceaga, asegurou que o "procedemento" para a elaboración das listas "é manifestamente mellorable" aínda que "as normas respectáronse escrupulosamente", tanto no referente ás municipais como a xenerais.
En entrevista en Radio Nacional de España recollida por Europa Press sinalou que "habería que facelo --o procedemento-- máis simple, máis claro", para establecer "de forma clara que os militantes no caso da lista opinan e despois quen compón son os distintos niveis da dirección".
Despois das dimisións que se produciron na Coruña e Ourense tras a Comisión Federal, na que se introduciron cambios nas listas dos candidatos ás municipais, Leiceaga remarca que "os militantes teñen que ter un papel", pero que "o que vai ser alcalde ten que ter un papel á hora de conformar o seu equipo e iso é o que hai que garantir, que os distintos intereses conflúan".
En todo caso, apunta a que as dimisións se produciron tanto por que, nuns casos, entendíase que non se atendeu á militancia, e noutros, ás preferencias dos candidatos. Así que remarca que aínda que se cumpriu o sistema, o procedemento debería ser "máis simple".
ENCE
Por outra banda, cuestionado polo futuro de Ence, Leiceaga insiste en que lle gustaría que a planta continuase, "se é posible na contorna de Pontevedra onde está agora" e responsabiliza das dúbidas actuais á xestión do PP, cando o Goberno de "Mariano Rajoy en funcións" prorrogou a concesión ata o ano 2073.
"O Goberno de España o que opina é que a lei aprobada polo Goberno de Rajoy limita as concesións a 75 anos en toda a súa extensión e Ence estaría máis aló", agrega, "e iso está a ser cuestionado nos tribunais". "Ence debe seguir en Galicia e con papel relevante", engade, aínda que matiza que "outra cousa é se o poderá facer onde está".
