Por E.P. | A CORUÑA | 26/03/2019 | Actualizada ás 14:45
En Común-Unidas Podemos presentará alegacións ao estatuto do consumidor electrointensivo para lograr un "cambio" no prezo da electricidade tanto nos fogares como na industria, un factor decisivo na crise de Alcoa e sobre o que o PSdG responde con "silencio".
"Queda claro que o partido socialista non vai rescatar a Alcoa", criticou Díaz, que ve "evidente" a salvación das plantas da multinacional se se "intervén" no proceso produtivo, tal e como xa fixo Francia, sinala. Por iso, Díaz chamou aos galegos a mobilizarse o día 28 de abril para, a través do voto, "colectivamente rescatar" Alcoa. "Estas eleccións van ser transcendentales para o noso país. Hai políticas que permiten con claridade rescatar un sector produtivo clave, como é a produción de aluminio primario", dixo.
En canto ao estatuto electrointensivo, anunciou que En Común presentará alegacións para "ser competitivos do mesmo xeito que o resto de países europeos" ante a crise que afecta a empresas como Alcoa.
INTERVENCIÓN DA LEI DO SECTOR
"Non se trata de rebaixar os impostos, como piden as eléctricas, senón que se trata de intervir a lei do sector eléctrico e aí temos as mans libres para enfrontarnos ás eléctricas", incidiu. "Lamentablemente o PSOE demostrou que non pode", engadiu Díaz tras ser preguntada polas declaracións da ministra de Industria, Reyes Maroto, que manifestou que a convocatoria electoral impide impulsar cambios lexislativos ou aprobar bonificacións fiscais.
Neste contexto, En Común-Unidas Podemos presenta alegacións porque, segundo di a súa candidata por Pontevedra, a ferrolá Yolanda Díaz, buscan "un cambio nos prezos enerxéticos" tanto para grandes como pequenos consumidores. Ademais, desde esta formación queren pór fin aos "beneficios caídos do ceo" de hidroeléctricas e nucleares. "Teñen que deixar de existir", sostén Díaz.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.