Por Europa Press / Redacción | SANTIAGO DE COMPOSTELA | 01/04/2019 | Actualizada ás 16:51
O municipio de Fene (A Coruña) está consternado polo falecemento de dous veciños desta localidade, ambos os dous irmáns, o maior, Abelardo José Vieito Lata, de 61 anos e Luís Ángel, de 57, que decidiron ir pescar á zona de cabo Prior, nas proximidades do porto exterior de Caneliñas, en Ferrol.
Para iso levantáronse cedo e viaxaron xuntos ata a zona, onde deixaron estacionado o vehículo dun deles, nas proximidades da Estación Depuradora de Augas Residuais (EDAR) de Ferrol.
Segundo algúns testemuños, todo fai indicar que un deles sufriu un contratempo mentres camiñaba polas rochas, en busca dun bo lugar para poder practicar a pesca con cana, á que ambos eran afeccionados.
Foi entón cando o outro, segundo as opcións que se barallan, tratou de axudalo e ambos acabaron caendo por unha zona escarpada, rematando no auga, onde pereceron aos pouco minutos afogados.
A voz de alarma deuna un buque de pesca, sobre as 10,30 horas deste domingo, 31 de marzo, que foi o que comunicou a Salvamento Marítimo o achado, e este á súa vez, a unha lancha da Garda Civil do Mar, que rescatou o primeiro dos corpos e trasladouno ao porto interior de Ferrol.
Minutos máis tarde atopouse o segundo cadáver, que foi tamén levado ao mesmo lugar e desde alí trasladados ao Hospital Naval, onde se lles practicou a autopsia á primeira hora da tarde do domingo.
Os corpos foron velados nun tanatorio de Ferrol situado no polígono da Gándara e partiron ás 17,00 horas cara ao cemiterio municipal de Fene, onde recibiron sepultura.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.