Por E.P. | SANTIAGO DE COMPOSTELA | 05/04/2019 | Actualizada ás 19:41
A presidenta da Deputación de Pontevedra, Carmela Silva, lamentou a "deplorable" actitude do grupo provincial do Partido Popular, pola súa reacción a raíz do adiamento do pleno ordinario previsto para o 26 de abril e ao que presentarán unha moción para falar da situación da fábrica de Ence na ría de Pontevedra.
O principal grupo da oposición considera que o traslado ao día 30 tenta "silenciar" aos traballadores da pasteira antes das eleccións xerais convocadas para o domingo 28 de abril. Ante estas acusacións, a presidenta da Deputación Provincial, reaccionaba este venres afirmando que "a min esta 'xentiña' xa me ten farta", en referencia aos deputados do Partido Popular.
A continuación sinalou que, en Pontevedra, o sindicato Comisións Obreiras e o PP "son o mesmo" culpándolles de ser os organizadores da protesta que levou a celebrar o último pleno provincial a porta pechada. A presidenta explicou en rolda de prensa que o adiamento do próximo pleno foi comunicado por vía telefónica como xa sucedera outras veces sen que se rexistrase ningún problema. E anunciou que, ante as queixas do portavoz popular Anxo Moldes, acaba de convocar unha xunta de portavoces para este luns 8 na que se aprobará por maioría o traslado do pleno ao día 30 de abril.
Carmela Silva dirixiu as súas críticas directamente ao presidente provincial do PP, Alfonso Rueda, e ao líder dos populares galegos e presidente da Xunta, Alberto Núñez Feijóo. "Feijóo considera que a oposición do PP é a presidenta da Deputación, pero non o son", afirmou. Silva mostrouse estrañada por que o persoal de Ence protestase ante a Deputación, que carece de competencias en relación coa situación da empresa pasteira, e, en cambio, non acudise ao pleno municipal de Pontevedra.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.