Ferido grave o condutor dun turismo tras saírse da vía en Santiago de Compostela
O accidente prodúxose as 8:30 da mañá. O ferido está grave pero puido saír polo seu propio pé do vehículo.
Por E.P. | SANTIAGO DE COMPOSTELA | 17/04/2019 | Actualizada ás 12:16
O condutor dun turismo resultou ferido grave nun accidente de tráfico rexistrado na mañá deste mércores tras saírse da vía na autovía A-54 en Santiago. Segundo os datos facilitados polo 112 Galicia a Europa Press, este sinistro tivo lugar sobre as 8:30 horas deste mércores na A-54 sentido Santiago de Compostela.
Foron varios condutores os que chamaron ao servizo de emerxencias para alertar do accidente, tras o que se mobilizou ao 061, a Garda Civil de Tráfico --que indicou que o condutor estaba ferido grave-- e bombeiros, porque nun inicio pensouse que estaba atrapado pero o accidentado puido saír polos seus medios do vehículo.
Este sinistro ocorre na xornada na que comeza a segunda fase da operación especial de tráfico de Semana Santa de 2019 que, lembra o 112, está "condicionada pola choiva, treboadas e refachos de vento intesas".
