O PSOE denuncia un convenio entre Xunta e Concello de Carballeda asinado "en plena campaña electoral"
O acordo está dotado con 140.000 euros e foi levado polos socialistas á Xunta Electoral.
Por E.P. | OURENSE | 18/04/2019 | Actualizada ás 17:04
O PSOE de Ourense informou este xoves da súa decisión de denunciar ante a Xunta Electoral un convenio "propagandístico" dotado con 140.000 euros e asinado entre a Xunta de Galicia e o Concello de Carballeda de Valdeorras, gobernado polo PP, "en plena campaña electoral".
O acordo, destinado a mellorar a contorna da estación de tren de Sobradelo, foi asinado na casa consistorial deste municipio e "difundido por todas as canles oficiais do Goberno galego que, en plena campaña, presume un día tras outro dos seus logros usando medios públicos", criticaron os socialistas nun comunicado.
O PSOE lembra que a Lei Orgánica do Réxime Electoral Xeneral "prohibe estas prácticas propagandísticas", polo que reclama ao PP que "se baixe dunha vez por todas do carro da propaganda máis basta e deixe de apropiarse de medios públicos para os seus fins partidistas".
