O PPdeG denuncia a "interpretación restritiva" do Goberno sobre a categoría de familia numerosa de tipo especial
Os populares reclaman que esta condición se manteña cando un dos fillos cumpra as condicións de "idade, convivencia ou dependencia".
Por E.P. | SANTIAGO DE COMPOSTELA | 22/04/2019 | Actualizada ás 15:02
A viceportavoz parlamentaria do PPdeG, Paula Prado, instou ao Goberno central a reconsiderar a "interpretación restritiva" que realiza da lei sobre a categoría de familia numerosa de tipo especial, un problema "que afecta a máis de 2.200 familias" en Galicia que perderon esta consideración cando os irmáns maiores deixaron de cumprir cos requisitos.
Nunha rolda de prensa celebrada este luns, Paula Prado presentou unha proposición non de lei que os populares levarán ao próximo pleno do Parlamento e na que piden á Xunta que manteña a categoría de familia numerosa especial cando un dos fillos "cumpra" coas condicións de "idade, convivencia ou dependencia dos pais".
Segundo explicou, a "interpretación restritiva" que realiza o Goberno sobre unha reforma da lei aprobada en 2015 provoca que estes núcleos "perdan" a consideración de "especial", aínda que o título de familia numerosa mantense. "Esta situación está a xerar unha discriminación no seo destas familias, que ven con impotencia como os irmáns menores que xeraron o dereito a ese título de familia numerosa de categoría especial, despois non poden gozar deses beneficios que o título lles confire", remarcou Prado.
Tras pór o foco en que xa existen sentenzas que dan a razón ás familias afectadas de acordo a unha recomendación efectuada polo Defensor do Pobo, a popular reclamou ao Goberno central que "flexibilice" a interpretación da lei.
