Por X.M. Fernández | Allariz | 26/04/2019 | Actualizada ás 10:00
O Concello de Allariz leva anos apostando por políticas de desenvolvemento sostible e nesa liña dá un paso máis involucrándose neste proxecto de carácter internacional que ten como obxectivo formar a profesionais especializados en estratexias de economía circular. Mario Pansera, veciño de Allariz e coordinador do proxecto, explica que ReTraCE “está deseñado especificamente para capacitar a novos líderes e académicos capaces de conducir a transición dun modo de produción e consumo máis sostible en Europa”.
A rede reúne a un equipo de expertos e líderes académicos a nivel mundial para lograr avances na comprensión da transición cara a unha Economía Circular (EC) con éxito no contexto europeo tanto dentro das organizacións e industrias existentes como a través de modelos de negocios innovadores e sostibles. O enfoque proposto é multidisciplinar e aspira a mellorar significativamente a comprensión actual sobre a aplicación da economía circular, dende un punto de vista económico, ambiental e social. De cara ás administracións, o programa de investigación pretende proporcionar información sobre o desenvolvemento e a implementación de políticas públicas que contribúan á ir implantando dinámicas de economía sostible.
O consorcio de 10 beneficiarios (7 grupos académicos e 3 non académicos do Reino Unido, Países Baixos, Bélxica, Suecia, Italia, Grecia e Alemaña) deseñará e ofrecerá capacitación multidisciplinaria a 15 investigadores, ofrecendo un programa de intercambios internacional a través da ampla rede de organizacións asociadas, entre eles o Concello de Allariz, involucradas na proposta.
A alcaldesa, Cristina Cid agradecía esta proposta “que pretende sentar as bases a nivel formativo de todos/as os/as profesionais encargados/as de afondar nun proxecto importante para Allariz, conseguir poñer en marcha unha rede de economía circular que faga que o mundo sexa máis sostible e no que Allariz leva tempo traballando coa posta en marcha de proxectos como o de compostaxe comunitaria, entre outros” e afirmaba tamén que “dende o rural tamén se pode traballar para o mundo e tomar decisións que poden cambiar o planeta”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.