Por Europa Press / Redacción | SANTIAGO DE COMPOSTELA | 30/04/2019 | Actualizada ás 11:53
O presidente do PP de Galicia, Alberto Núñez Feijóo, fixo un chamamento a "ensanchar" o partido e a "abrir" as súas portas para mantelo como o que "sempre foi", un "punto de encontro entre moitas sensibilidades" políticas.
Así o manifestou o tamén presidente da Xunta en declaracións aos medios á entrada do Parlamento galego, onde tivo sesión de control este martes e razón pola que non puido asistir ao Comité Executivo de 'Xénova' para analizar a histórica caída dos populares na xornada electoral do domingo.
Así, apostou por "ensanchar" o PP, que "sempre foi un punto de encontro entre moitas sensibilidades" de xente "que é máis de dereitas, máis liberal, máis conservadora, máis de centro, máis reformista" e "máis de centro esquerda", tal e como enumerou.
"O Partido Popular é o partido alternativo ao PSOE, vímolo nas urnas. Por tanto, a maioría de votantes de Vox estarán decepcionados porque verían como colaboraron, sen sabelo, no triunfo do PSOE. E tamén creo que hai moitos votantes de Cs que teñen cabida no PSOE", asegurou Feijóo.
"CANDO ENSANCHAMOS GAÑAMOS"
Seguidamente, ao ser preguntado sobre se Casado debe seguir á fronte da formación, o líder galego dixo que "non é o momento de pechar portas". "Temos que abrir portas a moita xente que ve que se nos unimos somos máis que o PSOE e se nos dividimos o PSOE, cos independentistas e os populistas, van gobernar España", aseverou.
Por iso, insistiu na idea de "ensanchar" o partido: "Cando ensanchamos gañamos e cando o limitamos pois lamentablemente non gañamos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.