A Cámara pide que se cumpra en empresas a cota de persoas con discapacidade e prímese en contratos públicos
Na proposta pídese tamén ao Goberno galego unha campaña de sensibilización entre empresas para o cumprimento da lexislación vixente.
Por E.P. | SANTIAGO DE COMPOSTELA | 30/04/2019 | Actualizada ás 19:45
O Parlamento galego emprazou por unanimidade á Xunta -tras unha iniciativa de En Marea transaccionada-- a defender a cota de reserva para persoas con discapacidade en empresas, así como a introducir cláusulas sociais na contratación pública que incentiven ás compañías a implantar medidas para a súa inserción laboral.
Nesta proposta tamén se empraza ao Goberno galego á posta en marcha dunha campaña de sensibilización entre empresas para o cumprimento da lexislación vixente. Ademais, na proposición que saíu adiante no pleno deste martes chámase ao Goberno central a reforzar as actuacións de inspección de traballo neste ámbito.
Aínda que a votación desta proposta tivo lugar este martes, o seu debate produciuse o luns. No seu transcurso a deputada de En Marea Carmen Santos alertou de que a taxa de paro neste colectivo é do 40 por cento, polo que incidiu en que "corresponde a todas as administracións favorecer a inclusión" aumentando o seu "nivel de independencia e autonomía".
